Mae Llywodraeth Cymru wedi amlinellu’r hyn y gall pobol ei ddisgwyl ar ddiwrnod etholiad y Senedd fis Mai.
Oherwydd y pandemig, bydd rheolau ychwanegol yn eu lle i warchod pleidleiswyr a cheisio rheoli ymlediad y coronafeirws.
Er y cyfyngiadau sydd yn parhau yn eu lle, mae Llywodraeth Cymru yn ffyddiog y bydd yr etholiad yn mynd yn ei flaen ar Fai 6, yn ôl eu trefniadau.
Bydd etholiadau lleol, y comisiynwyr heddlu ac etholiadau Senedd yr Alban hefyd yn mynd rhagddynt ar y diwrnod hwnnw.
Ond mae llawer ym Mae Caerdydd yn teimlo na ddylai fynd yn ei flaen tan fod sefyllfa’r argyfwng yn gwella.
Hylif diheintio a phensel yr un
Bydd etholiadau mis Mai yn cael eu cynnal mewn ffordd debyg i etholiadau a gynhaliwyd yn flaenorol, ond bydd rhai gwahaniaethau.
Gall pleidleiswyr sy’n mynd i orsafoedd pleidleisio ddisgwyl gweld llawer o’r mesurau diogelu maen nhw eisoes yn gyfarwydd â nhw.
Bydd hylif diheintio, sgriniau diogelwch, marciau pellter a rhwystrau diogelu yn cael eu defnyddio fel y bo’n briodol.
Bydd pleidleiswyr hefyd yn cael eu hannog i ddod â phensel i farcio eu papur pleidleisio, ond bydd pensiliau glân, newydd ar gael i bawb hefyd.
Bydd mesurau cadw pellter cymdeithasol ar waith y tu mewn a’r tu allan i orsafoedd pleidleisio a bydd rhaid i bob pleidleisiwr ac aelod o staff wisgo gorchudd wyneb tra eu bod nhw yno.
Ond mae’r Llywodraeth yn pwysleisio na ddylai unrhyw un sydd wedi profi’n bositif am y coronafeirws, neu sy’n dangos symptomau fynd i’r orsaf bleidleisio.
Mae modd i bobol sydd methu mynd i’r orsaf bleidleisio wneud hynny drwy bleidlais drwy’r post neu drwy benodi dirprwy i bleidleisio ar eu rhan.
Mae Llywodraeth Cymru, Llywodraeth y Deyrnas Unedig a Llywodraeth yr Alban wedi rhoi rheolau newydd ar waith i alluogi pleidleiswyr i fanteisio ar bleidlais frys drwy ddirprwy hyd at 5yp ar ddiwrnod yr etholiad.
Dim ymgyrchu traddodiadol
Ar hyn o bryd, does dim hawl gan bobol ymgyrchu a rhannu taflenni gwleidyddol.
Bydd gweithgarwch ymgyrchu yn cael dechrau wrth i gyfyngiadau Covid gael eu llacio.
Mae’r Llywodraeth hefyd wedi rhybuddio efallai y bydd y broses o gyfrif pleidleisiau a chyhoeddi canlyniadau yn cymryd mwy o amser nag etholiadau diwethaf.
Dywedodd Bwrdd Cydlynu Etholiadol Cymru fis Ionawr mai’r bwriad yw cyfrif pleidleisiau’r diwrnod canlynol yn hytrach na dros nos.
“Mae’r Deyrnas Unedig yn fyd-enwog am gynnal etholiadau o’r safon uchaf y gall pleidleiswyr fod yn gwbl hyderus ynddynt – etholiadau a ddarperir ym mhob ardal gan y Swyddog Canlyniadau statudol annibynnol,” meddai llywodraethau gwledydd Prydain mewn datganiad ar y cyd.
“Rydym yn gwbl hyderus yng ngallu’r Swyddogion Canlyniadau i gynnal yr etholiadau hyn mewn ffordd sy’n bodloni’r safonau uchaf o ran diogelwch y cyhoedd ac uniondeb democrataidd.
“Gobeithiwn y bydd pob etholwr yn manteisio ar y cyfle i ddweud ei ddweud yn etholiadau mis Mai gyda’r hyder bod y rhagofalon cywir ar waith.”
