Mae golwg360 wedi cael cadarnhad gan y Ceidwadwyr Cymreig na fydd yr Aelod o’r Senedd dros Orllewin De Cymru, Suzy Davies, yn sefyll yn yr etholiad nesaf.

Mae Suzy Davies, a ymgeisiodd am arweinyddiaeth y Ceidwadwyr Cymreig yn 2018, wedi bod yn Aelod o’r Senedd dros Orllewin De Cymru ers 2011.

Roedd hi wedi ei dewis i gystadlu am sedd Pen-y-bont ar Ogwr, ond mae wedi tynnu ei henw yn ôl.

Daw hyn ar ôl iddi golli ei lle ar restr ranbarthol Gorllewin De Cymru ar gyfer y Senedd.

Cadarnhaodd y Ceidwadwyr Cymreig ddydd Llun (Ionawr 18) mai Tom Gifford, arweinydd y Ceidwadwyr ar Gyngor Pen-y-bont ar Ogwr, fydd eu dewis cyntaf nhw ar gyfer y rnanbarth yn etholiadau’r Senedd fis Mai.

Mae Altaf Hussain yn ail, Samantha Chohan yn drydydd a Liz Hill O’Shea yn bedwerydd ar y rhestr.

Felly byddai’n rhaid iddi ennill etholaeth Pen-y-bont ar Ogwr i ddychwelyd i’r Senedd, ond ni fydd hi’n sefyll mwyach.

Y Ceidwadwyr oedd yn fuddugol yno yn etholiadau San Steffan yn 2019 ond y blaid Lafur sydd â’r sedd yn y Senedd ar hyn o bryd.

Wythnos diwethaf, adroddodd golwg360 fod mab Suzy Davies, sydd o blaid diddymu datganoli, ar restr ranbarthol Canol De Cymru’r Ceidwadwyr Cymreig.

Dewiswyd Arweinydd y blaid yn y Senedd, Andrew RT Davies, ar frig rhestr y blaid ar gyfer yr ardal, Joel James yn ail, Calum Davies (mab Suzy Davies) yn drydydd a Chris Thorne yn bedwerydd.

Mae’r gohebydd gwleidyddol Adrian Masters wedi trydar am y newyddion diweddaraf yma:

Gwleidyddiaeth

Suzy Davies yn colli ei lle ar restr ranbarthol y Ceidwadwyr

Mae’r Aelod Ceidwadol o’r Senedd o blaid datganoli, yn wahanol i’w mab sydd wedi cael lle ar restr rhanbarthol
Gwleidyddiaeth

Mab Aelod o’r Senedd ymhlith ymgeiswyr Ceidwadol sydd o blaid diddymu datganoli

A Suzy Davies AoS heb ei dewis yn rhanbarth Gorllewin De Cymru