Daeth cyhoeddiad y prynhawn ’ma, Ionawr 27, bod y Sioe Frenhinol yn Llanelwedd wedi’i chanslo eto eleni oherwydd y coronafeirws.
Roedd disgwyl i sioe amaethyddol fwyaf Ewrop gael ei chynnal yn Llanelwedd fis Gorffennaf eleni, ond mae bygythiad parhaus y coronafeirws yn golygu nad oedd dewis ond canslo.
Daw hyn wedi i’r Sioe orfod cael ei chanslo’r llynedd oherwydd y pandemig.
“Rydym yn parhau i weithio ochr yn ochr â Llywodraeth Cymru ac Iechyd Cyhoeddus Cymru i greu Map Ffordd ar gyfer ailagor digwyddiadau yn ddiogel,” meddai Prif Weithredwr y Sioe Frenhinol, Steve Hughson.
“Mae ein digwyddiadau yn ganolog i’r economi wledig ac i’r ffordd o fyw wledig ac yn golygu cymaint i aelodau, arddangoswyr, masnachwyr ac ymwelwyr ac rydym yn deall yn llwyr y cyfrifoldeb ar bob un ohonom i sicrhau ein bod yn darparu ein digwyddiadau cyn gynted ag y mae’n ddiogel gwneud hynny.
“Er gwaethaf yr heriau hyn mae’r Gymdeithas wedi camu ymlaen i gefnogi ein cymuned leol trwy ddarparu cyfleusterau yn rhad ac am ddim ar gyfer Canolfan Profi Covid a chanolfan brechu torfol.”
‘Digwyddiadau llai posib’
Er bod Sioe Frenhinol wedi’i gohirio, mae’r Gymdeithas wedi ymrwymo i geisio cynnal digwyddiadau llai sy’n cydymffurfio â rheolau Covid yn ystod yr haf a chynnal “chwip o Ffair Aeaf”.
“Byddwn yn archwilio’r posibiliadau o ran digwyddiadau llai, amgen yr haf hwn a gyda Bwrdd y Cyfarwyddwyr a byddwn yn parhau i ganolbwyntio ar ddiogelu ein Cymdeithas ar gyfer y genhedlaeth nesaf,” meddai Cadeirydd y Cyngor John T Davies.
“Rydym yn gwerthfawrogi cefnogaeth ein haelodau a rhanddeiliaid eraill yn fawr. Ni fu cefnogaeth barhaus pawb sy’n gysylltiedig â’r Gymdeithas erioed yn bwysicach.”
“Mae o’n siomedig iawn ond yn hollol ddealladwy”
