Mae brechlyn Covid-19 yng Nghymru yn cael ei ddarparu “cyn gynted ag y gallwn”, yn ôl yr Ysgrifennydd Iechyd Vaughan Gething.
Mae hefyd yn rhagweld mai Cymru fydd y “wlad sy’n perfformio bumed orau yn y byd” o ran brechu.
Daw ei sylwadau wedi i’r Prif Weinidog Mark Drakeford gael ei feirniadu am ddweud y bydd yn ymestyn y broses frechu dros chwe wythnos – yn hytrach na defnyddio’r brechlynnau cyn gynted â phosib.
“Mae’r Prif Weinidog wedi egluro ei sylwadau ac wedi ei gwneud hi’n glir nad ydym yn dal unrhyw frechlyn yn ôl,” meddai Vaughan Gething wrth BBC 5 Live heddiw (dydd Mawrth, Ionawr 19).
“Ein her fwyaf yw darparu seilwaith digonol i ddarparu’r brechlyn Pfizer heb ei wastraffu.
“O ran cyfraddau gwastraff yng Nghymru, mae’n sefyllfa dda iawn. Mae llai nag 1% o’r brechlyn yn cael ei wastraffu, mae hynny’n lefel uchel iawn o effeithlonrwydd.
“Felly rydyn ni’n gallu cyflwyno’r brechlyn mewn modd y gallwn ni ddarparu mwy a mwy ohono. Yr wythnos hon, byddwn yn darparu hyd yn oed mwy o’r brechlyn Pfizer na’r wythnos diwethaf.
“Wrth gwrs, mae gan bob gwlad yn y Deyrnas Unedig stociau o’r brechlyn Pfizer y maen nhw’n eu cadw mewn cyfleusterau rhewgell oherwydd i ni gyd dderbyn y cyflenwad diwethaf o Pfizer tua mis yn ôl, felly rydym i gyd yn gweithio drwy hynny cyn gynted ag y gallwn.”
‘Pumed wlad sy’n perfformio orau yn y byd’
“Yn rhyngwladol Cymru fydd y bumed wlad sy’n perfformio orau yn y byd,” meddai Vaughan Gething wedyn.
“Ond rydyn ni hefyd yn gwybod ein bod ni’n mynd i gael ein cymharu gyda gwledydd eraill y Deyrnas Unedig.
“Rydw eisiau bod yn glir, os byddwn yn cyflawni ein cerrig milltir, byddwn yn yr un lle â gwledydd eraill y Deyrnas Unedig fwy na lai yr un pryd ac y bydd pob un o’n pedwar grŵp blaenoriaeth wedi eu brechu erbyn canol mis Chwefror.”
70% o bobl dros 80 wedi eu brechu erbyn diwedd yr wythnos
Ychwanegodd Vaughan Gething y bydd 70% o breswylwyr cartrefi gofal a phobol dros 80 wedi eu brechu erbyn diwedd yr wythnos.
Mae disgwyl y bydd pobol dros 70 yn cael eu gwahodd “yn y dyfodol agos”.
Dywedodd hefyd y bu “ymdrech sylweddol” i frechu staff iechyd a gofal cymdeithasol rheng flaen yn ddiweddar.
“Nawr fod gennym gyfuniad o Pfizer ac AstraZeneca rydyn ni’n gweithio drwy’r boblogaeth,” meddai.
“Rwy’n disgwyl yn ddiweddarach yr wythnos hon i gyhoeddi ffigurau sy’n rhoi mwy o fanylion am sut mae’n mynd, ond rydym yn gwybod bod pob parafeddyg rheng flaen yng Nghymru naill ai wedi cael eu brechu neu wedi cael cynnig un.”
Dim cofnod bod brechu wedi ei drafod yng nghyfarfodydd Cabinet Llywodraeth Cymru
