Mae bellach yn ofynnol i deithwyr sy’n cyrraedd Cymru o dramor gael prawf negyddol am Covid cyn teithio.
Daw hyn wedi i’r un mesurau gael eu cyflwyno yn Lloegr a’r Alban wythnos ddiwethaf.
O ddydd Llun Ionawr 18 ymlaen, bydd rhaid i deithwyr sy’n cyrraedd Cymru ar gychod, awyrennau neu drenau o dramor gael prawf negyddol hyd at 72 awr cyn gadael y wlad y maen nhw ynddi.
Mae’r mesurau yn cael eu cyflwyno i ddiogelu rhag yr amrywiolyn newydd o’r coronafeirws ym Mrasil, Denmarc a De Affrica yn ddiweddar.
Er mwyn darparu amddiffyniad pellach rhaid i deithwyr sy’n cyrraedd o wledydd risg uchel nad ydynt ar restr Coridor Teithio Llywodraeth Cymru barhau i hunanynysu am 10 diwrnod waeth beth fo canlyniad eu prawf cyn gadael.
‘Atal mewnforio’r feirws’
“Bydd y mesurau newydd hyn yn helpu i sicrhau ein bod yn atal mathau newydd o’r feirws rhag cael eu mewnforio i Gymru,” meddai’r Gweinidog Iechyd, Vaughan Gething.
“Rydym eisoes yn gofyn i deithwyr sy’n dychwelyd o wledydd risg uchel hunanynysu am 10 diwrnod ac mae’r gofynion hyn yn parhau.
“Yn ogystal â’r gofyniad i hunanynysu, bydd profion cyn gadael yn fesur diogelu arall i’n helpu i reoli’r feirws wrth i ni barhau i gyflwyno’r brechlyn yn gyflym.”
Ni chaniateir teithio am wyliau o dan rybudd lefel 4, boed hynny yng Nghymru, i fannau eraill yn y Deyrnas Unedig neu dramor.
.jpg){kind=link}