Mae deiseb i sefydlu rhaglen Erasmus rhwng Cymru a gwledydd yr Undeb Ewropeaidd wedi denu dros 50 o lofnodion, sy’n golygu y bydd yn mynd gerbron pwyllgor deisebau Senedd Cymru.
Mae’r ddeiseb yn galw ar Lywodraeth Cymru i sefydlu rhaglen Erasmus ar gyfer myfyrwyr yng Nghymru ar ôl i Brydain adael yr Undeb Ewropeaidd, sy’n golygu na all myfyrwyr Cymru, Lloegr, yr Alban a Gogledd Iwerddon barhau i elwa o’r cynllun.
Roedd y Deyrnas Unedig yn rhan o gynllun Erasmus ers 1987, ac roedd yn rhoi’r hawl i fyfyrwyr astudio a gweithio ledled Ewrop, gyda miloedd yn manteisio ar y cynllun bob blwyddyn.
Yn ei le, bydd cynllun newydd ar raddfa fyd-eang yn dwyn enw Alan Turing yn cael ei gyflwyno.
‘Fandaliaeth ddiwylliannol’
“I’n pobol ifanc, mae’n golygu fandaliaeth ddiwylliannol drwy eu torri o raglen Erasmus+, y mae pobol o Gymry wedi gwneud cymaint i ddylanwadu arni a’i meithrin,” meddai Mark Drakeford, prif weinidog Cymru yr wythnos ddiwethaf.
“Mae hefyd yn gwadu dyfodol iddynt lle gallant fyw a gweithio’n rhydd ar draws cyfandir Ewrop gyfan,” ychwanegodd y Prif Weinidog.
“Ergyd fawr”
Mae Richard Lochhead wedi beirniadu cynllun Turing, gan ddweud ei fod yn “wannach” ac nad yw’n derbyn cymaint o arian ag yr oedd cynllun Erasmus.
Wrth drafod rhaglen Erasmus, dywed fod y cynllun “yn gwbl hanfodol”, ac yn un “sy’n dod â gwahanol wledydd a chenhedloedd ynghyd, gyda buddiannau diwylliannol ac addysgiadol enfawr”.
