“Peidiwch â dod i’r porthladd yn ystod y cyfnod hwn”

Wedi i Ffrainc atal traffig o borthladd Dover mae Llywodraeth Iwerddon hefyd wedi cyhoeddu mai dim ond cerbydau nwyddau hanfodol sydd yn cael teithio yno.

Fe fydd Prif Weinidog y Deynras Unedig, Boris Johnson, yn cadeirio cyfarfod o bwyllgor brys Cobra heddiw (dydd Llun, Rhagfyr 21) yn dilyn rhybuddion y bydd y gwaharddiad yn “amharu’n sylweddol” ar borthladdoedd.

‘Cadw draw’

Mae cwmni Stena Line – sydd yn hwylio rhwng Caergybi a Dulyn a rhwng Abergwaun a Rosslare –wedi annog teithwyr i gadw draw o borthladdoedd.

“Dim ond gweithwyr cadwyn gyflenwi hanfodol sydd â phrawf o statws o’r fath sy’n cael teithio,” meddai Stena Line. 

“Peidiwch â dod i’r porthladd yn ystod y cyfnod hwn gan na chaniateir i chi deithio.”

Wrth gyhoeddi’r cyfyngiadau newydd ar deithio dywedodd y Gweinidog Iechyd Iwerddon Stephen Donnelly bod Llywodraeth Iwerddon yn “yn bryderus am y straen newydd o’r coronafeirws.”

Mae cwmni Irish Ferries hefyd wedi dweud mai dim ond cludo nwyddau sy’n cael ei ganiatáu rhwng Caergybi a Dulyn a rhwng Doc Penfro a Rosslare.

“Mae llywodraeth Iwerddon wedi rhoi gwybod wrthym i beidio â derbyn unrhyw deithwyr sy’n teithio i Iwerddon,” meddai’r cwmni.

“Bydd Irish Ferries yn rhoi ad-daliad i’w ddefnyddio eto i’r rhai nad ydynt bellach yn gallu teithio.

“Nid yw hyn yn berthnasol i yrwyr cludo nwyddau.”

Bydd cyfyngiadau Iwerddon ar hediadau a phorthladdoedd yn para am 48 awr ac yn cael eu hadolygu mewn cyfarfod cabinet ddydd Mawrth, Rhagfyr 22.