Fe fydd £110m o gymorth ariannol ychwanegol i fusnesau sydd wedi’u heffeithio gan y cyfyngiadau coronafeirws diweddaraf, sy’n dod i rym dros y Nadolig, cyhoeddodd Llywodraeth Cymru heddiw (Dydd Gwener, Rhagfyr 18).
Mae’r cyllid yn ychwanegol i’r £340m o gymorth i fusnesau a gyhoeddwyd gan Lywodraeth Cymru ddiwedd fis Tachwedd ac mae’r Llywodraeth yn disgwyl i’r pecyn cymorth newydd helpu degau o filoedd o gwmnïau ledled Cymru.
Bydd busnesau lletygarwch, manwerthu nad yw’n hanfodol, twristiaeth, hamdden a busnesau’r gadwyn gyflenwi yn gymwys ar gyfer y cymorth ariannol.
Mae disgwyl i Eluned Morgan, y Gweinidog Iechyd Meddwl, Llesiant a’r Gymraeg ddatgelu rhagor o wybodaeth am y pecyn cyllido hwn yng nghynhadledd Llywodraeth Cymru heddiw.
Dyma’r cyfyngiadau sy’n dod i rym:
- Am 6.00 yr hwyr ar Noswyl Nadolig bydd manwerthu nad yw’n hanfodol, gan gynnwys gwasanaethau cyswllt agos, hamdden a champfeydd yn cau.
- Am 6.00 yr hwyr Ddydd Nadolig bydd busnesau lletygarwch yn cau.
- Cyhoeddodd y Prif Weinidog Mark Drakeford ddechrau’r wythnos bydd clo mawr yng Nghymru o 28 Rhagfyr ymlaen.
