Bydd pedwar o bobol o wahanol aelwydydd yn gallu cyfarfod mewn tafarndai, caffis a bwytai ar ôl i’r clo dros dro ddod i ben yng Nghymru ddydd Llun (Tachwedd 9).

Fodd bynnag, dim ond pobol o’r un aelwyd estynedig fydd yn cael cyfarfod mewn cartrefi.

Dywed y prif weinidog Mark Drakeford fod Llywodraeth Cymru wedi “gwrando ar bobol ifanc a phobol sengl ynglŷn â phwysigrwydd cwrdd â ffrindiau a theulu”.

Fydd dim terfyn ar nifer y bobol sy’n cael cyfarfod os ydyn nhw’n byw o fewn yr un aelwyd a fydd y rheol ddim yn cynnwys plant o dan 11 oed.

Fydd dim modd gwerthu alcohol ar ôl 10 o’r gloch y nos.

“Mae hyn yn amodol ar reolau llym sy’n cael eu trafod â’r sector lletygarwch, gan gynnwys archebu ymlaen llaw a slotiau amser cyfyngedig,” meddai Mark Drakeford.

“Fel ym mhob agwedd ar ein bywydau, bydd cynnal hylendid da a chadw ein pellter yn hanfodol yn y lleoliadau hyn.”

Bydd siopau campfeydd a sefydliadau eraill a wnaeth gau yn ystod y cyfnod clo dros dro hefyd yn ailagor.

Cyhoeddodd y Prif Weinidog ddoe (dydd Llun, Tachwedd 2) y byddai cyfres o fesurau “symlach” newydd yn cael eu rhoi mewn lle i geisio atal lledaeniad y coronafeirws yng Nghymru wedi’r clo dros dro.

Dwy aelwyd yn cael ymuno i greu swigen

Ar ôl y clo dros dro, bydd dwy aelwyd yn cael ymuno i greu swigen.

“Gartref, gan gynnwys yn yr ardd, dim ond gyda phobol o’u cartref estynedig y bydd pobol yn gallu cwrdd ag eraill, a bydd cartref estynedig yn cael ei gyfyngu i ddim ond dwy aelwyd,” meddai Mark Drakeford.

“Mae partïon tai, digwyddiadau mwy a dod ynghyd dan do yn parhau i fod yn anghyfreithlon, ac rydym am wneud y rheolau hyn yn gliriach.”

Er mwyn cadw’r cyfyngiadau yn syml, eglurodd na fyddai cyfyngiadau ar deithio yn cael eu rhoi yn eu lle yng Nghymru, ond y dylai pobol osgoi teithio os nad yw’n hanfodol.

Ychwanegodd fod teithio i Loegr ac oddi yno wedi ei wahardd oni bai bod rheswm hanfodol fel gwaith neu addysg.

Bydd clo cenedlaethol yn dod i rym yn Lloegr ddydd Iau (Tachwedd 5).

‘Gadael busnesau i lawr’

Mae Paul Davies, arweinydd y Ceidwadwyr Cymreig, wedi cyhuddo’r Prif Weinidog o “adael busnesau i lawr”.

“Mae angen eglurder ar fusnesau ac mae angen cymorth arnynt,” meddai.

“Mae’n gwbl hanfodol fod y Llywodraeth Lafur yma yn darparu hyn.

“Rhaid cofio mewn rhai ardaloedd sydd wedi bod dan glo lleol cyn hyn nad clo o 17 diwrnod sydd yn dod i ben ond clo o bum wythnos.”