Mae Plaid Cymru bellach wedi dewis ei hymgeiswyr ar y rhestrau rhanbarthol ar gyfer etholiad Senedd flwyddyn nesa’.

Ar hyn o bryd mae gan y Blaid bum sedd ranbarthol yn y siambr, ac mae’r rhan fwyaf o’r AoSau rheiny ar restrau rhanbarthol 2021.

Mae Delyth Jewell a Llŷr Gruffydd ar frig eu rhestrau ymgeiswyr hwythau, ond mae Helen Mary Jones yn ail i’r cynghorydd sir, Cefin Campbell, yn ei rhanbarth hithau.

Dai Lloyd a Bethan Sayed yw’r ddau AoS Plaid Cymru arall sydd â seddi rhanbarthol ar hyn o bryd, ond fyddan nhw ddim ar y rhestr flwyddyn nesa’.

Mae Bethan Sayed eisoes wedi dweud y bydd hi’n camu o’r neilltu, tra bod Dai Lloyd eisoes wedi dweud na fydd yn sefyll ar y rhestr rhanbarthol.

Mi fydd yn sefyll am sedd etholaeth Gorllewin Abertawe yn unig (sedd saff i Lafur).

Mater sydd yn siŵr o fod yn destun trafod yw’r ffaith bod Sahar al-Faifi yn bedwerydd ar restr ranbarthol Canol De Cymru. Bu’r ymgeisydd ynghlwm â sgandal gwrth-Semitiaeth.

Cafodd y rhestrau eu llunio yn sgil pleidlais ymhlith aelodau. Mae golwg360 yn deall bod problemau technegol wedi amharu ar y broses pleidleisio mewn ambell ardal.

Y rhestrau

Datgelwyd y rhestrau isod o ymgeiswyr i aelodau’r Blaid.

Dwyrain De Cymru

  1. Delyth Jewell
  2. Peredur Owen Griffiths
  3. Lindsay Whittle
  4. Rhys Mills

Canol De Cymru

  1. Rhys ab Owen
  2. Heledd Fychan
  3. Fflur Elin
  4. Sahar Al-Faifi

Gorllewin De Cymru

  1. Luke Fletcher
  2. Sioned Williams
  3. John Davies
  4. Jamie Evans

Canolbarth a Gorllewin Cymru

  1. Cefin Campbell
  2. Helen Mary Jones
  3. Rhys Thomas
  4. Elwyn Vaughan

Gogledd Cymru

  1. Llŷr Gruffydd
  2. Carrie Harper
  3. Elin Walker Jones
  4. Owen Hurcum

Adolygiad

Yn y cyfamser, mae Plaid Cymru wedi dweud y bydd Liz Saville-Riberts yn cynnal adolygiad i sicrhau fod gan y blaid ymagwedd “dim goddefgarwch” tuag at wrth-Semitiaeth.

Daw hyn yn sgil adroddiad y Comisiwn Cydraddoldeb a Hawliau Dynol ar wrth-Semitiaeth yn y Blaid Lafur. 

Mae Bwrdd Dirprwyon Iddewon Prydain a Chyngor Cynrychiolwyr Iddewig De Cymru wedi mynegi pryder fod “gwrth-Semitiaeth yn cael ei goddef ym Mhlaid Cymru”, yn sgil y sgandal am sylwadau Sahar al-Faifi.

Dywedodd arweinydd Plaid Cymru, Adam Price, wrth BBC Wales:

“Nid yw Plaid Lafur Cymru yn ddiogel rhagddi [gwrth-semitiaeth], nid yw Plaid Cymru yn ddiogel rhagddi.

“Alla i ddim cynnwys fy hun [yn yr adolygiad] am y rhesymau da iawn a nodir yn adroddiad y Comisiwn Cydraddoldeb a Hawliau Dynol mewn achosion disgyblu unigol, ond fy nghyfrifoldeb i yw sicrhau bod ein diwylliant, mae ein strwythurau, ein prosesau, wir yn cyflawni dull dim goddefgarwch o ymdrin â gwrth-Semitiaeth ac unrhyw fath arall o ragfarn grefyddol.”

Bydd ymgeiswyr etholiad Plaid Cymru hefyd yn cael hyfforddiant ar fynd i’r afael â gwrth-Semitiaeth, ychwanegodd Mr Price wrth y BBC.