Mae capten Cymru, Alun Wyn Jones, wedi cydnabod i Undeb Rygbi Cymru ofyn am ganiatâd arbennig gan Lywodraeth Cymru i adael i’w deulu fynychu’r gêm yn erbyn yr Alban ym Mharc y Scarlets heddiw, ond nad oedd hynny’n bosib.
Bydd y Cymro 35 oed yn torri’r record o ran chwarae’r nifer fwyaf o gemau prawf yn hanes y gêm, gan ennill cap rhif 149.
“I fod yn deg, fe holwyd y cwestiwn,” meddai Alun Wyn Jones mewn cynhadledd i’r wasg cyn y gêm.
“Gofynnwyd i’r Llywodraeth am ganiatâd oherwydd amgylchiadau eithriadol.
“Ond yn y darlun mawr, dydy un diwrnod yn ddim byd i feddwl ein bod ni yng nghanol clo arall, a bod rhannau helaeth o Gymru wedi bod dan glo lleol cyn hynny.
“Mae’r ffaith ein bod ni’n gallu chwarae – sydd yn fraint yn ei hunan – yn llawer pwysicach mewn gwirionedd.”
‘Teulu wedi cadw ei draed ar y ddaear’
Wrth drafod y garreg filltir hanesyddol yn ei yrfa, roedd Alun Wn Jones am ddiolch i’w deulu.
“Ni allaf ddweud digon am y gefnogaeth dw i wedi ei derbyn gan fy nheulu ar hyd y daith yma.
“Pan fydda i’n gorffen fy ngyrfa, mi fyddan nhw yna i mi a bydd y gêm yn symud ymlaen, dw i’n ymwybodol iawn o hynny.
“Dw i wedi bod yn ffodus iawn – fy Mam, fy chwaer, fy nhad pan oedd o gwmpas, ac wrth gwrs fy ngwraig a’r merched yn ddiweddarach – sydd sicr wedi cadw fy nhraed ar y ddaear.”
“Pe bai ond wedi bod yr un cap hwnnw, byddai’r gêm yna wedi bod yn un arbennig iawn i fi a fy nheulu,” meddai Alun Wyn Jones.
Bellach mae wedi gwisgo crys coch Cymru 139 gwaith a chrys y Llewod naw gwaith.
‘Ffodus iawn i allu chwarae o gwbl’
Wrth edrych ymlaen at y gêm heddiw, dywedodd Alun Wyn Jones ei bod hi’n fraint gallu chwarae, boed hynny tu ôl i ddrysau caeedig ym Mharc y Scarlets neu beidio.
Eglurodd fod y ffaith fod gêm merched Cymru yn erbyn yr Alban wedi ei gohirio yn adlewyrchu hynny.
“Rydym yn ffodus iawn i allu chwarae o gwbl, a gobeithio gall pawb ddychwelyd i’r cae yn fuan.
“Rydym ni gyd yn gwybod am y buddion o chwarae, gwylio a chymryd rhan mewn chwaraeon felly dydym ni sicr ddim yn cymryd hyn yn ganiataol.
“Fydd hi siwr yn dawelach na’r arfer ym Mharc y Scarlets, wrth gwrs fel chwaraewr y Gweilch byddai’n well gen i fod yn chwarae yn y Liberty. Ond na, mae’n fraint fawr i ni allu chwarae o gwbl.”
Cymru v Yr Alban yn fyw ar S4C gyda’r gic gyntaf am 2.15
