Mae’r Academi Brydeinig Celfyddydau Ffilm a Theledu yng Nghymru wedi cyhoeddi’r enillwyr eleni gyda chadeirydd Bafta Cymru yn croesawu “cydnabod cynifer o ymarferwyr crefft benywaidd”.
Yn sgil y coronafeirws roedd seremoni Bafta Cymru yn cael ei chynnal ar-lein eleni.
Alex Jones oedd y prif gyflwynwraig, ac roedd eraill yn ymuno â hi trwy gyswllt fideo, gan gynnwys Alexandra Riley, Tom Rhys Harries, Katherine Jenkins a Catherine Zeta-Jones.
Cydnabod ymarferwyr benywaidd
Croesawodd Angharad Mair, Cadeirydd BAFTA Cymru, bod y gwobrau eleni yn cydnabod ymarferwyr benywaidd a oedd yn arwain y ffordd.
“Wrth i Wobrau BAFTA Cymru ddod i ben am flwyddyn arall, er hynny mewn fformat gwahanol, rwy’n falch iawn o weld cynifer o ymarferwyr crefft benywaidd yn cael eu cydnabod eleni, yn ogystal â’r ganran uchel o’r rhai a dderbyniodd eu gwobr BAFTA gyntaf”, meddai Angharad Mair.
Yn ôl Angharad Mair “ni fu erioed amser pwysicach i ddathlu’r byd celfyddydol yng Nghymru.”
Roedd y 10 categori crefft wedi’u dominyddu gan ymarferwyr benywaidd, wrth i Siân Jenkins ennill ei hail wobr Dylunio Gwisgoedd ar gyfer Eternal Beauty a Rebecca Trotman yn ennill ei gwobr Golygu gyntaf am ei gwaith ar Doctor Who: Ascension of the Cyberman.
Enillodd Melanie Lenihan ei gwobr Colur a Gwallt gyntaf ar gyfer War of the Worlds.
Derbynnydd gwobr Torri Trwodd 2020 oedd Lisa Walters am ei rôl fel cynhyrchydd ar On The Edge: Adulting.
Tair gwobr i ‘His Dark Materials’
Ar ôl derbyn naw enwebiad eleni enillodd cyfres deledu BBC a HBO His Dark Materials dair gwobr.
Ruth Wilson enillodd y wobr Actores orau am ei rhan fel Marisa Coulter yn y gyfres, ac enillodd Suzie Lavelle y wobr Ffotograffiaeth a Goleuo, a Joel Collins y wobr Dylunydd Cynhyrchu.
Gwobr Cyfraniad Arbennig i Leslie Dilley
Y cyfarwyddwr celf a dylunydd cynhyrchu Leslie Dilley o’r Rhondda oedd enillydd Gwobr Cyfraniad Rhagorol i Ffilm a Theledu BAFTA Cymru eleni.
Mae’n fwyaf adnabyddus am ei waith ar y ffilmiau Star Wars, Alien, Raiders of the Lost Ark a The Abyss.
Dyma’r tro cyntaf i ddylunydd cynhyrchu ennill y wobr arbennig hon.
Pum gwobr i S4C
Ymhlith yr enillwyr roedd pum gwobr i S4C.
Enillodd Emma Walford a Trystan Ellis Morris categori’r Cyflwynydd Gorau am eu gwaith ar y gyfres Prosiect Pum Mil (Boom Cymru), a chyfres ddogfen Ysgol Ni: Maesincla (Cwmni Darlun) gipiodd y wobr Cyfres Ffeithiol Orau.
“Eleni eto mae llwyddiannau S4C yn dyst i ymroddiad a chreadigrwydd y sector”, meddai Amanda Rees, Comisiynydd Cynnwys S4C.
“Mae amryw o unigolion a chwmnïau cynhyrchu talentog yn creu cynnwys o’r safon uchaf all gydio yn nychymyg y gwylwyr.
“Llongyfarchiadau mawr i’r enillwyr i gyd.”
Rhestr enillwyr BAFTA Cymru 2020:
- Rhaglen Ddogfen Unigol: The Prince And The Bomber
- Cyfarwyddwr: Ffeithiol: Siôn Aaron a Timothy Lyn, Eirlys Dementia a Tim
- Dylunio Cynhyrchu: Joel Collins, His Dark Materials
- Rhaglen Blant: Deian A Loli
- Awdur: Kayleigh Llewellyn, In My Skin
- Colur a Gwallt: Melanie Lenihan, War Of The Worlds
- Ffotograffiaeth a goleuo ffuglen: Suzie Lavelle, His Dark Materials
- Actores: Ruth Wilson fel Mrs Coulter, His Dark Materials
- Cyfres Ffeithiol: Ysgol Ni Maesincla
- Newyddion A Materion Cyfoes: Channel 4 News, Flooding Strikes The South Wales Valleys
- Sain: Tîm Cynhyrchu Good Omens
- Cerddoriaeth Wreiddiol: Jonathan Hill, The Long Song
- Torri Trwodd: Lisa Walters, On The Edge, Adulting
- Ffilm Fer: Salam
- Rhaglen Adloniant: Cyrn ar y Mississippi
- Cyflwynydd: Emma Walford a Trystan Ellis-Morris, Prosiect Pum Mil
- Golygu: Rebecca Trotman, Doctor Who
- Cyfraniad Rhagorol i Ffilm a Theledu: Les Dilley
- Cyfarwyddwr Ffuglen: Lucy Forbes, In My Skin
- Actor: Jonathan Pryce fel Cardinal Jorge Mario Bergoglio, The Two Popes
- Dylunio Gwisgoedd: Sian Jenkins, Eternal Beauty
- Drama Deledu: The Left Behind
