Gellid gorfodi ail gyfnod clo o fewn wythnosau os nad yw pobl yn newid eu hymddygiad, meddai’r Gweinidog Iechyd yn y gynhadledd i’r wasg ddydd Llun.
Rhybuddiodd Vaughan Gething fod y patrwm cynyddol o achosion yn debyg i’r sefyllfa a wynebwyd ddechrau mis Chwefror a dywedodd fod yn rhaid cymryd camau i atal niwed sylweddol neu glo llawn arall.
Cynyddodd nifer yr achosion newydd yng Nghymru gan 183 ddydd Llun (14 Medi) – y cynnydd mwyaf mewn achosion dyddiol ers 19 Mai – gan ddod â chyfanswm nifer yr achosion a gadarnhawyd i 19,573.
Daeth cyfyngiadau newydd i rym ddydd Llun (14 Medi), gan wneud gwisgo gorchuddion wyneb yn orfodol mewn mannau dan do cyhoeddus a gwahardd mwy na chwech o bobl o aelwyd estynedig rhag cyfarfod y tu mewn.
“Cynyddu’n sydyn”
Dywedodd Mr Gething wrth y gynhadledd i’r wasg fod nifer yr achosion mewn ardaloedd o’r De, fel bwrdeistref sirol Caerffili, Rhondda Cynon Taf, Merthyr Tudful a Chasnewydd wedi “cynyddu’n sydyn”:
“Ar ddechrau mis Chwefror, roeddem yn wynebu sefyllfa lle nad oedd gennym yr ystod o wybodaeth sydd gennym yn awr,” meddai Mr Gething.
“Felly mae cyfnod o wythnosau i ni ddatrys rhai o’r heriau sydd gennym, a dyna pam rydym yn apelio at bobl i ailystyried [eu] dewisiadau… pwy rydyn ni’n eu gweld, faint o bobl rydyn ni’n eu gweld… oherwydd fel arall efallai y bydd angen i ni wneud mwy o ddewisiadau cloi lleol neu o bosibl gloi cenedlaethol.”
Gofynnwyd i Mr Gething a oedd y tebygrwydd rhwng nawr a mis Chwefror yn golygu bod Cymru’n mynd i ail gloi o fewn saith wythnos.
“Os nad oes newid mewn ymddygiad, mae’n ddigon posibl na fyddem ond saith wythnos i ffwrdd o glo cenedlaethol, a gallai fod yn llawer cynt,” meddai.
