Mae Jo Stevens, llefarydd materion Cymreig Llafur yn San Steffan, wedi gofyn “Beth yw pwrpas Rishi Sunak?”
Daw ei sylwadau wrth iddi ymateb i adroddiadau bod Prif Weinidog y Deyrnas Unedig yn rhy brysur i gynnal trafodaeth dros y ffôn â Mark Drakeford, Prif Weinidog Cymru, am sefyllfa gweithfeydd dur Tata Steel ym Mhort Talbot.
Mae Cyfeillion y Ddaear wedi beirniadu diffyg cynllunio gan Lywodraeth San Steffan ar gyfer dyfodol gwyrdd ar ôl i’r cwmni dur gyhoeddi eu bod nhw’n cau ffwrneisi, gan beryglu miloedd o swyddi.
“Beth yw pwrpas Rishi Sunak?” meddai Aelod Seneddol Canol Caerdydd.
“Mae bywoliaeth gweithwyr Tata yn y fantol, a wnaiff e ddim hyd yn oed ateb ei ffôn.
“Pe bai Llywodraeth Lafur yn y Deyrnas Unedig nawr, fyddai gweithwyr dur Cymru ddim wedi dihuno i’r newyddion hwn heddiw.
“Mae Llafur wedi clustnodi buddsoddiad o £3bn er mwyn sicrhau y daw’r symudiad i ddur gwyrdd â swyddi i Gymru.”
Ysgrifennydd Cymru’n amddiffyn y llywodraeth
Yn y cyfamser, mae David TC Davies, Ysgrifennydd Cymru, wedi amddiffyn Llywodraeth y Deyrnas Unedig.
“Mae Llywodraeth y Deyrnas Unedig wedi addo hanner biliwn o bunnoedd i achub oddeutu 5,000 o swyddi a miloedd yn rhagor yn y gadwyn gyflenwi,” meddai.
“Bydd £100m arall ar gael i Fwrdd Pontio i ailhyfforddi pawb fydd yn colli eu swyddi.
“Heb y cytundeb hwn, byddai Tata wedi tynnu allan o weithfeydd dur Port Talbot, gyda phob swydd yn cael ei cholli.”
Port Talbot: Ymateb chwyrn wrth i Tata gadarnhau y bydd 2,800 o swyddi’n cael eu colli
Tata: Beirniadu diffyg cynllunio gan Lywodraeth San Steffan ar gyfer dyfodol gwyrdd
