Bydd Llywodraeth Cymru’n derbyn £135 miliwn o gyllid ychwanegol gan Lywodraeth y Deyrnas Unedig i fynd tuag at ehangu’r rhaglen frechu ac ymateb i’r pandemig.
Yn ôl Llywodraeth y Deyrnas Unedig bydd yr arian ychwanegol hwn yn rhoi sicrwydd nawr i’r llywodraethau datganoledig, yn hytrach na’u bod nhw’n gorfod aros am y broses amcangyfrifon atodol fformiwla Barnett yn y flwyddyn newydd.
Mae’r arian yn ychwanegol i’r cyllid sydd wedi’i amlinellu yng Nghyllideb Hydref 2021.
Os fydd y cyllid ychwanegol i’r llywodraethau datganoledig yn fwy na’r arian a fydd yn cael ei roi drwy fformiwla Barnett ac yn cael ei gadarnhau yn ystod y broses amcangyfrifon atodol, yna bydd y gwahaniaeth yn cael ei ad-dalu yn 2022-23, neu yn ystod yr Adolygiad Gwario.
Os yw’r cyllid canlyniadol drwy fformiwla Barnett yn uwch na’r swm sydd wedi’i roi, yna bydd Llywodraethau Cymru, yr Alban a Gogledd Iwerddon yn cadw’r arian ychwanegol.
“Cynnig sicrwydd”
Dywedodd Ysgrifennydd Gwladol Cymru, Simon Hart: “Yn ystod y ddwy flynedd ddiwethaf rydyn ni wedi mynd i’r afael â’r pandemig fel un Deyrnas Unedig, gyda Llywodraeth y Deyrnas Unedig yn darparu brechlynnau a phrofion Covid, a’r Lluoedd Arfog yn cefnogi Cymru, yn ogystal â’n mesurau ariannol arloesol sydd wedi amddiffyn tua 500,000 o swyddi yng Nghymru.
“Mae’r cyhoeddiad cyllid hwn yn cynnig sicrwydd i Lywodraeth ddatganoledig Cymru wrth iddyn nhw gynllunio’u hymateb i’r pandemig dros yr wythnosau nesaf, a bydd yn cael ei ddilyn gan record o setliad gwerth £18 biliwn y flwyddyn [a gafodd ei gyhoeddi] yn y Gyllideb ddiweddar fel bod Llywodraeth Cymru yn gallu darparu gwasanaethau hanfodol gan gynnwys iechyd, addysg ac amddiffynfeydd llifogydd dros y blynyddoedd nesaf.”
Cynnal cyfarfod Cobra gyda’r llywodraethau datganoledig
