Mae yna gymysgedd o gyffro a phryder yn Aberteifi ynghylch y posibilrwydd o don o ymwelwyr.
Dyna mae maer y dref wedi ei ddweud wrth i Lywodraeth Cymru gadarnhau y bydd cyfyngiadau teithio yn cael eu llacio.
Mae Clive Davies wedi cyhoeddi ystadegau am niferoedd ymwelwyr i’r dref dros y misoedd diwethaf, ac mae yntau’n edrych ymlaen at weld rhagor o fwrlwm yno.
Ond mae’n cydnabod mai llafn â dau fin iddi yw’r llacio rheolau, a’r twf posib yn niferoedd yr ymwelwyr.
“Mae yna bryder, achos ‘dyn ni ddim yn gwybod shwt mae’n mynd i fod,” meddai wrth golwg360. “Y gobaith yw na fydd pobol yn dod mewn niferoedd r’yn ni wedi gweld yn y cyfryngau.
“Mae pobol yn gallu bod dros ben llestri… Felly, ie, gobeithio y dawn nhw’n bwyllog… Wedi dweud hynny, mae yna dipyn o ddala lan gyda ni i’w wneud [o ran busnes].”
Mae’r rheiny sydd yn berchen ar westai hunanwasanaeth (self service) yn medru derbyn cwsmeriaid o Orffennaf 11 ymlaen, ac mae Clive Davies yn disgwyl i hynny gael effaith ar Aberteifi.
Mae’n rhagweld y bydd y tymor gwyliau yn ymestyn i mewn i Fedi a Hydref, ac mae’n gobeithio bydd y rheol cadw pellter dau fedr yn parhau.
Blychau dros y dref
Mae yna sustem casglu data mewn grym yn Aberteifi, a trwy’r sustem yma mae Clive Davies wedi gallu cael gwybodaeth am niferoedd ymwelwyr.
Mae’n egluro bod yna flychau ar adeiladau “trwy’r dre” a bod buddsoddiad wedi’i rhoi i wneud hynny yn 2016.
Pwyntiau wi fi ydyn nhw sydd yn cofnodi ffonau, ond does dim rhaid i chi fod ar y sustem ddiwifr i gael eich pigo fyny.
Dydyn nhw ddim yn cofnodi unrhyw fanylion personol, meddai’r maer, gan egluro bod archfarchnadoedd yn defnyddio’r sustem yma.
“Dyna i gyd dw i wedi ei wneud yw ehangu beth sydd gyda’r archfarchnadoedd, neu yn y canolfannau siopa,” meddai. “Maen nhw ym mhobman.”
Fis diwethaf dywedodd wrth golwg360 bod niferoedd ymwelwyr yn “dechrau codi”.
Tourism footfall numbers showing slight increase in June even though easing of @WelshGovernment have yet to be applied for travel & accommodation in @cardigan_town area. Should see a much steeper increase from next week. #TownAnalytics pic.twitter.com/fYMWQ7J2Mq
— Cyng/Cllr Clive Davies (@CliveBronydd) July 2, 2020
Y blychau
Mae’r data sy’n cael ei gofnodi gan y blychau yn dangos:
- Pa ardaloedd o’r dref sydd fwyaf prysur
- Pa mor aml mae pobol yn dod i’r dref
- Am ba mor hir mae pobol yn aros yn y dref
- Os ydyn nhw wedi bod yn y dre o’r blaen – a sawl gwaith
