Mae Cymry wedi profi llwyddiant yn y Gemau Paralympaidd yn Tokyo heddiw (dydd Iau, Awst 26).
Enillodd y Gymraes Georgia Wilson, 25, fedal efydd yn y merlota.
Daeth yr alwad i Georgia Wilson ymuno â gweddill carfan Prydain yn hwyr iawn wedi i Sophie Christiansen orfod tynnu’n ôl ar ôl i’w cheffyl dderbyn triniaeth.
Fe wnaeth Wilson ddechrau marchogaeth yn ddwy oed ar ôl i rywun ddweud wrth ei mam y byddai’n ei helpu i ddatblygu ei balans.
Roedd Wilson yn cystadlu ar gefn ei cheffyl Sahura.
Tenis bwrdd
Yn y cyfamser, mae Joshua Stacey drwodd i’r wyth olaf yn y tenis bwrdd.
Fe ddechreuodd e chwarae tennis bwrdd yn 13 oed a phedair blynedd yn ddiweddarach, cafodd e ddiagnosis o barlys yr ymennydd.
Enillodd y fedal efydd i Gymru yng Ngemau’r Gymanwlad yn Awstralia yn 2018.
Roedd yn safle 13 ar restr detholion y byd yn ei gamp cyn y Gemau, felly byddai ennill medal yn dipyn o gamp.
