Wrth i dîm merched Cymru baratoi ar gyfer Cwpan Rygbi’r Byd, mae S4C wedi cyhoeddi eu bod nhw am ddarlledu pob un o’r gemau’n fyw yn ystod y twrnament.
Bydd Ioan Cunningham, y prif hyfforddwr, a charfan Cymru’n teithio i Seland Newydd ym mis Hydref, lle byddan nhw’n herio Seland Newydd, Awstralia a’r Alban yng Ngrŵp A.
Gyda phob gêm yn cael ei chwarae yn ystod oriau mân y bore yng Nghymru, bydd S4C yn dangos darllediadau byw ar-lein o bob gêm ar S4C Clic a thudalen YouTube y sianel.
Bydd cyfle arall i wylio’r gemau yn eu cyfanrwydd ddiwedd y prynhawn ar S4C, S4C Clic a BBC iPlayer.
Cafodd y gystadleuaeth ei gohirio y llynedd yn sgil Covid, a bydd Cymru’n dechrau eu hymgyrch yn Whangarei ddydd Sul, Hydref 9.
Bydd y ddau dîm gorau o’r tri grŵp rhagbrofol yn symud ymlaen i rownd yr wyth olaf, ynghyd â’r ddau dîm yn y trydydd safle sydd â’r mwyaf o bwyntiau.
Pe bai Cymru’n cymhwyso o’u grŵp, bydd S4C yn parhau i ddarlledu pob gêm yn fyw.
‘Tyfu’r gefnogaeth’
“Rydym yn hapus iawn bod S4C am ddilyn ein taith yn Seland Newydd yn fyw a hefyd gydag ail-ddangosiadau ar deledu pan fydd timoedd menywod gartref yn paratoi ar gyfer gemau eu hunain yng nghlybiau Cymru,” meddai Siwan Lillicrap, capten Cymru.
“Rydyn ni’n hynod o falch i gynrychioli Cymru dros yr wythnosau nesaf ac mae’n bwysig iawn ein bod ni’n parhau i dyfu’r gefnogaeth rydym wedi mwynhau ers Chwe Gwlad Menywod TikTok yn gynharach eleni.”
‘Cyfnod cyffrous’
Heledd Anna fydd yn cyflwyno’r rhaglenni ar S4C, yng nghwmni sawl chwaraewr rhyngwladol Cymru fydd yno i ddadansoddi’r gemau.
“Mae hwn yn gyfnod hynod o gyffrous i’r tîm cenedlaethol ac mae Cwpan Rygbi’r Byd yn gyfle enfawr i’r tîm dangos bod ganddynt y gallu i wneud y cam nesaf a chystadlu gyda goreuon y byd,” meddai.
“Maen nhw mewn grŵp anodd, heb os, ond maen nhw wedi paratoi yn dda iawn ac rydym yn gobeithio y byddan nhw’n barod am yr her fydd yn ei wynebu.
“Byddwn ni’n dilyn carfan Cymru yn agos iawn ar S4C, gyda chyfweliadau a chynnwys ar sianelau @S4CRygbi cyn bob gêm, yn ogystal â’n darpariaeth estynedig ar ddiwrnod y gêm, felly ymunwch â ni am y daith gyfan.”
Gemau Cymru ar S4C:
Dydd Sul, Hydref 9 – Cymru v Yr Alban – y gic gyntaf am 5.45yb (amser Cymru)
Dydd Sul, Hydref 16 – Cymru v Seland Newydd – y gic gyntaf am 3.15yb (amser Cymru)
Dydd Sadwrn, Hydref 22 – Awstralia v Cymru – y gic gyntaf am 2.15yb (amser Cymru)
