Mae rheolwr Clwb Pêl-droed y Drenewydd, Chris Hughes, yn dweud ei bod “bron yn amhosib” i dimau Cymru gystadlu ar lefel Ewropeaidd.
Colli o 1-0 (5-0 dros ddau gymal) yn erbyn Dundalk oedd hanes y Drenewydd yng Nghyngres Ewropa neithiwr (nos Fawrth, 13 Gorffennaf).
Our European campaign comes to end with a 0-1 defeat but we can certainly be proud of all the lads for their efforts over the two games pic.twitter.com/9rQf5VIVCD
— Newtown AFC (@NewtownAFC) July 13, 2021
Cymhwysodd y Drenewydd ar gyfer Cyngres Ewropa ar ôl trechu Caernarfon o 5-3 yn rownd derfynol y gemau ail gyfle’r tymor diwethaf.
Cyngres Ewropa yw cystadleuaeth newydd UEFA ar gyfer timau lefel isaf Cynghrair Ewropa, sydd wedi ei gwtogi o 48 i 32 o dimau yn y grwpiau eleni.
Does dim timau’n cymhwyso’n uniongyrchol i grwpiau Cyngres Ewropa, gyda deg tîm yn disgyn o Gynghrair Ewropa a’r gweddill yn dod drwy’r rowndiau rhagbrofol.
Roedd y tîm cartref yn wynebu tasg enfawr ar ôl colli o 4-0 yn Iwerddon yr wythnos ddiwethaf.
Ond roedd hwn yn berfformiad dipyn yn fwy parchus, a hynny yn erbyn tîm sydd wedi hen arfer cystadlu yn Ewrop, gan gyrraedd y grwpiau yng Nghynghrair Ewropa y llynedd.
Michael Duffy sgoriodd unig gôl y gêm ar ôl 52 munud, gan rwydo yn erbyn y Drenewydd am yr ail wythnos yn olynol.
‘Amhosibl cystadlu’
Fodd bynnag, ar ôl y golled doedd y rheolwr, Chris Hughes, ddim yn hapus a galwodd am fwy o fuddsoddiad yng ngêm ddomestig Cymru.
“Mae’n ymwneud â lefelau,” meddai wrth Sgorio.
“Rydych chi’n gofyn i fy nhîm, fy nghriw o chwaraewyr, chwarae yn erbyn clwb a enillodd 4.5m ewro ar ôl cyrraedd y grwpiau’r y tymor diwethaf – roedden nhw’n chwarae yn erbyn Arsenal y llynedd.
“Gadewch i ni wneud hynny yn glir yn gyntaf.
“Yn ail, dydy ein tymor ni heb ddechrau eto, tra eu bod nhw yn chwarae pêl-droed ar hyn o bryd.
“Mae bron yn amhosibl cystadlu.
“Rwy’n gwybod bod pobol wedi siarad amdano dros y blynyddoedd… ac yna mae’n tueddu i gael ei anghofio.
“Mae’r tymor domestig yn dechrau ac yna rydyn ni’n meddwl am y peth eto’r haf nesaf pan nad yw’r clybiau’n gwneud cystal.”
‘Buddsoddiad’
“Y gwahaniaethau rhwng y ddau glwb yw’r buddsoddiad, yr arian gwobr maen nhw’n ei gynhyrchu ac maen nhw’n parhau i fuddsoddi,” meddai Chris Hughes wedyn.
“Mae eu cyllideb (Dundalk) yn llawer iawn uwch nag unrhyw glwb yn ein cynghrair ni. Byddai’n anodd iawn i unrhyw un gystadlu â nhw.
“Dydw i ddim yn gwybod yr ateb. A ddylai fod mwy o fuddsoddiad mewn clybiau gan y llywodraeth? Mwy o gefnogaeth o bosibl? Ai chwarae pêl-droed yn ystod yr haf yw’r ateb?
“Mae’n gwestiwn nad oes neb wedi cael yr ateb iddo ers amser maith.”
"It's virtually impossible to compete"
Sylwadau Chris Hughes, rheolwr Y Drenewydd, ar ôl colli'n erbyn Dundalk yng Nghyngres Europa@NewtownAFC manager Chris Hughes' comments after exiting the Europa Conference League against Ireland's Dundalk pic.twitter.com/JnECEd5t5r
— ⚽ Sgorio (@sgorio) July 13, 2021
Gêm fawr i Cei Connah – sy’n herio FC Alashkert gyda dim ond 15 yn y garfan
