Siom fu i dimau Cymru yn Ewrop neithiwr (nos Iau, 9 Gorffennaf) ar y cyfan, gyda’r un ohonynt yn llwyddo i ennill.
Roedd y Seintiau Newydd, y Bala a’r Drenewydd yn cystadlu yng Nghyngres Ewropa, cystadleuaeth newydd UEFA.
Mae hi’n gystadleuaeth ar gyfer timau lefel isaf Cynghrair Ewropa, sydd wedi ei gwtogi o 48 i 32 o dimau yn y grwpiau eleni.
Does dim timau’n cymhwyso’n uniongyrchol i grwpiau Cyngres Ewropa, gyda deg tîm yn disgyn o Gynghrair Ewropa a’r gweddill yn dod drwy’r rowndiau rhagbrofol.
Glentoran FC 1 – 1 Y Seintiau Newydd
Gêm gyfartal gafodd y Seintiau Newydd oddi gartref yn erbyn Glentoran FC.
Sgoriodd Leo Smith gôl anhygoel i’r Seintiau cyn i Jamie McDonagh unioni’r sgôr gyda 10 munud yn weddill.
L̶e̶o̶ ̶M̶e̶s̶s̶i̶ ❌
??? ????? ✅
A superb solo effort from the Saints midfielder to open the scoring against Glentoran. #UECL
? @mikeharristns pic.twitter.com/tWZXLeQ65d
— Y Clwb Pêl-Droed (@YClwbPelDroed) July 8, 2021
Mae’r canlyniad yn golygu bod gobeithion y Seintiau o gyrraedd yr ail rownd ragbrofol yn dal yn eu dwylo nhw eu hunain.
Bydd yr ail gymal yn cael ei gynnal ar 15 Gorffennaf yn Neuadd y Parc, Croesoswallt, gyda’r gic gyntaf am 6:15yh.
Y Bala 0 – 1 Larne FC
Colli o 1-0 oedd hanes y Bala yn erbyn Larne FC, y clwb o Ogledd Iwerddon oedd yn chwarae yn Ewrop am y tro cyntaf yn eu hanes.
Sgoriodd David McDaid unig gôl y gêm ar ôl dau funud, yn dilyn camgymeriad amddiffynnol gan y Bala.
Dyw’r canlyniad ddim yn ddiwedd y byd i’r Bala, fydd yn gobeithio am fuddugoliaeth pan fyddan nhw’n teithio i Barc Inver, Larne, yng Ngogledd Iwerddon ar 15 Gorffennaf.
Bydd y gêm honno yn dechrau am 7:30yh.
Dundalk 4 – 0 Y Drenewydd
Y Drenewydd gafodd y noson waethaf o dimau Cymru heb os, gan golli 4-0 oddi cartref yn erbyn Dundalk.
Mae Dundalk, o Weriniaeth Iwerddon, wedi hen arfer â chystadlaethau Ewropeaidd, ac fe gyrhaeddon nhw’r grwpiau yng Nghynghrair Ewropa y llynedd.
Michael Duffy sgoriodd y gôl gyntaf i’r tîm cartref, a hynny ar ôl 34 munud.
Bum munud yn ddiweddarach, rhwydodd David McMillan i ddyblu mantais Dundalk.
Sgoriodd Will Patching y drydedd, cyn i Han Jeong-woo ddymchwel unrhyw obeithion oedd gan y Drenewydd gyda phedwaredd gôl y tîm cartref.
Bydd yr ail gymal yn cael ei gynnal ar 13 Gorffennaf yn Neuadd y Parc, Croesoswallt, gyda’r gic gyntaf am 5:45yh.
