Gêm ola’r tymor criced

Swydd Derby yw gwrthwynebwyr Morgannwg yng Nghaerdydd ar gyfer gêm ola’r tymor criced heddiw (dydd Mawrth, Medi 26).

Hon fydd gêm ola’r prif hyfforddwr Matthew Maynard wrth y llyw, yn dilyn ei ymddiswyddiad yn ddiweddar.

Mae’r bowliwr cyflym Timm van der Gugten yn dychwelyd ar ôl anaf, tra bod y batiwr Sam Northeast allan ar ôl cael llawdriniaeth.

Mae Morgannwg yn bumed, a’u gobeithion o ennill dyrchafiad ar ben, tra bod Swydd Derby yn chweched.

Mae hon yn gêm hanesyddol, wrth i ddynes – Sue Redfern – ddyfarnu am y tro cyntaf erioed yn y Bencampwriaeth.

Gemau’r gorffennol

Cafodd Morgannwg fuddugoliaeth swmpus dros Swydd Derby yng Ngerddi Sophia y llynedd, diolch i record David Lloyd (313), wrth i Forgannwg sgorio 550 am bump cyn cau’r batiad.

Cipiodd Ajaz Patel, troellwr Seland Newydd, bum wiced wrth orfodi’r Saeson i ganlyn ymlaen.

Ar ôl chwarae yn Abertawe yn 2018 a 2019, doedd Swydd Derby heb ymweld â Chaerdydd ers 2017 cyn hynny.

Gêm ddydd a nos oedd honno o ganlyniad i arbrawf gyda’r bêl binc dan y llifoleuadau.

Enillodd y Saeson o 39 rhediad wrth i Forgannwg gwrso 212 i ennill, gyda’r troellwr ifanc Hamidullah Qadri yn cipio pum wiced yn ei gêm Bencampwriaeth gyntaf erioed.

Tîm Morgannwg: E Byrom, Z ul Hassan, C Ingram, K Carlson (capten), B Root, C Cooke, D Douthwaite, A Gorvin, T van der Gugten, J Harris, J McIlroy

Tîm Swydd Derby: H Came, L Reece, B Guest, M Wagstaff, L du Plooy (capten), M Lamb, A Dal, A Thomson, Z Chappell, P Brown, S Conners

Sgorfwrdd