Bydd gwersi Cymraeg yn cael eu cynnig i drigolion yn Llydaw cyn i Gymru chwarae eu gêm nesaf yng Nghwpan Rygbi’r Byd.
Fe fydd Elwyn Hughes, tiwtor sy’n byw ar gyrion Pontypridd, yn ymweld â dinas Naoned (Nantes) pan fydd Cymru’n herio Georgia yno ymhen pythefnos.
Ynghyd â chynnal gwersi Cymraeg i oedolion a phobol ifanc yng nghanolfan Ewropeaidd y ddinas, bydd yn dysgu’r iaith i wirfoddolwyr lleol, ac yn helpu i groesawu torfeydd i’r gêm.
Mae Naoned wedi’i gefeillio â Chaerdydd ers 1964 ac yn ôl y Ganolfan Dysgu Cymraeg Genedlaethol, sy’n trefnu’r cynllun ar y cyd â Llywodraeth Cymru, mae nifer yno’n ymwybodol o Gymru a’r Gymraeg.
Bydd ymweliad Elwyn Hughes, sy’n dod yn wreiddiol o Ruthun, yn cyd-fynd â nifer o ddigwyddiadau eraill yn y ddinas i hyrwyddo Cymru a’r Gymraeg fel rhan o gynllun ‘Cymru yn Ffrainc’ Llywodraeth Cymru.
Yn ogystal â’r gwersi Cymraeg, bydd gêm olaf Cymru yn eu grŵp yn cael ei dangos yn y ganolfan Ewropeaidd, Maison de l’Europe, gyda sesiwn blasu cwrw, gwin a wisgi Cymreig.
‘Cyflwyno Cymru’ i bobol
Bu Elwyn Hughes yn diwtor Dysgu Cymraeg am dros 40 mlynedd, cyn iddo ymddeol yn ddiweddar.
Yn siaradwr Ffrangeg, bu’n byw am gyfnod yn Llydaw a Quebec.
“Dw i’n edrych ymlaen yn fawr at ymweld â Nantes, a hynny am y tro cyntaf erioed,” meddai.
“Mi fydd hefyd yn brofiad newydd i mi fod yng nghanol bwrlwm Cwpan Rygbi’r Byd a’r holl ddigwyddiadau yn ymwneud â Chymru.
“Yn y gwersi ar gyfer oedolion a phobol ifanc yr ardal yn Maison de l’Europe, mi fydda i’n cyflwyno Cymru iddyn nhw – ein hanes a’n diwylliant – ac ychydig bach o Gymraeg.
“Yna, mi fydda i’n rhoi gwersi i’r gwirfoddolwyr fydd yn gweithio yn ystod gêm olaf Cymru yn eu grŵp, yn erbyn Georgia.
“Dw i’n siŵr y bydd yna amryw o gefnogwyr Cymru fydd yn synnu o gael stiwardiaid yn Ffrainc yn eu cyfarch yn Gymraeg!”
‘Ennyn diddordeb’
Ychwanega Dona Lewis, Prif Weithredwr y Ganolfan Dysgu Cymraeg Genedlaethol, mai’r prif nod ydy ennyn diddordeb yn y Gymraeg a Chymru.
“Rydyn ni’n hynod gyffrous y bydd y Gymraeg yn cael ei dysgu allan yn Ffrainc fel rhan o fwrlwm Cwpan y Byd,” meddai.
“Roedd Elwyn yn ddewis amlwg ar gyfer y prosiect gan ei fod yn siarad Ffrangeg ac yn diwtor Dysgu Cymraeg profiadol ac uchel ei barch.
“Bonne chance, Elwyn!”
