Mae Clwb Criced Morgannwg wedi canmol Alex Horton, eu wicedwr ifanc o Drecelyn, sydd wedi’i ddewis yng ngharfan dan 19 Lloegr ar gyfer Cwpan y Byd yn y Caribî fis nesaf.
Mae’n un o 15 o chwaraewyr yn y garfan, wrth i Loegr herio Bangladesh (Ionawr 16), India’r Gorllewin (Ionawr 18) a’r Emiradau Arabaidd Unedig (Ionawr 20).
Enillodd Lloegr y Plât yn y gystadleuaeth ddiwethaf.
“Rydyn ni wrth ein boddau o weld Alex yn cael ei ddewis ar gyfer Cwpan y Byd dan 19,” meddai Mark Wallace, Cyfarwyddwr Criced Morgannwg.
“Fe weithiodd e’n galed dros ben ar ei gêm eleni ac mae’n dechrau cael ei wobrwyo, a does dim rheswm pam na all e wthio am le yn nhîm cyntaf Morgannwg y tymor nesaf.
“Yn nwylo’r clwb nawr mae cynhyrchu cricedwyr o safon uchel fel Alex, a fydd yn herio am le yn nhîm Morgannwg, ac am anrhydeddau gyda Lloegr, gobeithio.”
Wicedwr ifanc o Gymru’n llygadu lle yng Nghwpan y Byd
