Mae prif gynghreiriau pêl-droed Cymru wedi cael eu gohirio tan o leiaf dydd Sul, 9 Ionawr, yn sgil cyfyngiadau Covid-19 newydd.

Daw hyn ar ôl i Lywodraeth Cymru gyhoeddi heddiw (dydd Mercher, 22 Rhagfyr) y byddai torfeydd yn holl ddigwyddiadau chwaraeon y wlad yn cael eu cyfyngu i 50 o bobol o Ddydd San Steffan ymlaen.

Bydd cynghreiriau’r Cymru Premier, Cymru North a South, yn ogystal â chynghreiriau Ardal a chynghreiriau’r merched, Adran, yn cael ei rhoi ar stop.

Dywed Cymdeithas Bêl-droed Cymru bod y penderfyniad wedi ei wneud “wedi ymgynghori â’r cynghreiriau a chlybiau oedd â gemau dros gyfnod yr ŵyl.”

Bydd bwrdd cynghreiriau’r gymdeithas yn monitro’r sefyllfa dros yr wythnosau nesaf, a byddan nhw ddim yn cynnig diweddariad tan ar ôl 9 Ionawr.

‘Er budd gorau’r gêm’

Dywedodd y Gymdeithas Bêl-droed eu bod nhw wedi cynllunio ar gyfer unrhyw ymyrraeth o achos Covid-19 yn gynharach yn y flwyddyn.

“Cyn tymor 2021/22, fe wnaeth Cymdeithas Bêl-droed Cymru ystyried aflonyddwch yn ymwneud â Covid-19 i’w cynlluniau, gyda rhai cynghreiriau yn dechrau eu tymhorau yn gynt na’r arfer i ddadwneud yr effaith,” medden nhw mewn datganiad.

“Mae Cymdeithas Bêl-droed Cymru yn cydnabod y byddai colled sylweddol mewn incwm i glybiau yn y cynghreiriau dan sylw pe bai gemau yn cael eu cynnal heb fwy na 50 o bobol yn gwylio.

“Byddai hynny’n ychwanegu at siom eithriadol cefnogwyr a fyddai’n methu â gwylio eu clybiau pe bai gemau’n cael eu chwarae y tu ôl i ddrysau caeedig.

“I leihau ar yr incwm sy’n cael ei golli ac i roi’r cyfle gorau i gefnogwyr barhau i allu gwylio eu clybiau, roedd Bwrdd y Gynghrair Genedlaethol yn teimlo bod atal y cystadlaethau dros gyfnod yr ŵyl er budd gorau’r gêm.

“Bydd Bwrdd y Gynghrair Genedlaethol yn cyfathrebu â’r cymdeithasau fesul ardal fel y gallwn wneud penderfyniad gwybodus am y cynghreiriau a’r cystadlaethau sydd o dan eu gorchwyl.”