Mae Adil Rashid, troellwr coes Swydd Efrog a Lloegr, wedi ategu honiadau Azeem Rafiq am gyn-gapten Lloegr Michael Vaughan.
Dywedodd Rafiq fod Vaughan wedi dweud bod “gormod o’ch math chi, mae’n rhaid i ni wneud rhywbeth amdano fe”, wrth gyfeirio at nifer y chwaraewyr o dras Asiaidd oedd yn chwarae i dîm criced Swydd Efrog ar y pryd.
Mae Rashid, sydd wedi chwarae 199 o weithiau dros ei wlad ac a oedd yn aelod o dîm Lloegr enillodd Gwpan y Byd yn 2019, wedi treulio’i yrfa gyfan gyda’r sir.
Mewn datganiad i’r cylchgrawn The Cricketer, dywed Rashid ei fod yntau hefyd yn cofio’r sylwadau wnaeth Vaughan, a gafodd ei enwi yn dilyn ymchwiliad annibynnol i honiadau Azeem Rafiq ddechrau’r mis hwn.
“Roeddwn i eisiau canolbwyntio gymaint â phosib ar fy nghriced ac osgoi tynnu fy sylw ar draul y tîm, ond gallaf gadarnhau atgof Azeem Rafiq o sylwadau Michael Vaughan i ni fel criw o chwaraewyr Asiaidd,” meddai.
Mae Michael Vaughan wedi gwadu’r honiadau.
Croesawu ymchwiliad
Mae Adil Rashid yn croesawu’r ymchwiliad annibynnol gan Bwyllgor Digidol, Diwylliant, Cyfryngau a Chwaraeon San Steffan.
Ond dydy e ddim wedi gwneud unrhyw honiadau newydd, er ei fod yn dweud ei fod yn barod i gefnogi gwaith y pwyllgor.
Mae’n dweud bod “rhaid dileu hiliaeth”.
“Dw i wedi fy nghalonogi gan y ffaith fod pwyllgor seneddol fel pe bai’n ceisio gwella’r sefyllfa, boed wrth ddwyn pobol i gyfrif neu’n sicrhau bod newidiadau ar lefel sefydliadol,” meddai.
“All y rhain ddim ond bod yn ddatblygiadau positif.”
Azeem Rafiq a hiliaeth Swydd Efrog: Llywodraeth y Deyrnas Unedig yn barod i weithredu
