Daeth cadarnhad na fydd y Gymraes Amy Dowden yn cymryd rhan yng ngweddill y gyfres Strictly Come Dancing eleni o ganlyniad i anaf.
Cafodd y gwasanaethau brys eu galw i’r stiwdio yn ystod ymarferion dros y penwythnos, a hynny fel rhagofal ar ôl iddi gael ei tharo’n wael yn ystod y sioe deledu nos Sadwrn (Tachwedd 2).
Bydd Lauren Oakley yn cymryd ei lle yn y gyfres, gan bartneru’r canwr JB Gill.
Mae’r BBC wedi datgan eu cefnogaeth i Amy Dowden wrth iddi wella.
Salwch
Roedd Amy Dowden, sydd wedi siarad yn agored am fyw â chyflwr Crohn’s, wedi gwella o ganser y fron mewn da bryd i gymryd rhan yn y gyfres eleni.
Wnaeth hi ddim ymddangos yn y gyfres y llynedd gan ei bod hi’n derbyn triniaeth am y canser.
Yn dilyn y newyddion na fydd hi’n cymryd rhan yn y gyfres o hyn ymlaen, dywedodd Amy Dowden ei bod hi’n torri’i chalon.
“Dros y misoedd diwethaf, roeddwn i’n teimlo fel fi fy hun unwaith eto,” meddai ar Instagram.
“Bellach, nid canser oedd y peth cyntaf roeddwn i’n meddwl amdano wrth ddihuno, ond coreograffi, dewis cerddoriaeth, pa ddawnsfeydd ym mha drefn, yr hyn roedd angen i ni weithio arno.
“Roeddwn i’n teimlo’n rhydd unwaith eto.”
Amy Dowden yn siarad am ddysgu Cymraeg a chyflwr Crohn’s
