Dw i’n colli amynedd ag S4C.
Dw i’n un o nifer o bobol fu’n ymgyrchu dros sefydlu’r sianel deledu Gymraeg. Es i drwy’r system llysoedd, hyd yn oed, gyda chydwladwyr eraill yn sgil fy ngweithredoedd.
Dw i’n falch ei bod wedi bod yn llwyddiannus ar y cyfan, ond mae gan bob un eu gwendidau a’u problemau cyllidebol.
Roedd y problemau ymhlith yr uwch-reolwyr yn ddiweddar yn syndod i mi, ond mae hi fel pe bai’r problemau hyn wedi bod yn mudlosgi heb eu datrys. Gadewch i ni obeithio bod ymchwiliad trylwyr a chyfiawn heb orfod talu symiau mawr o arian allan yn gyhoeddus am unrhyw gamweddau honedig.
Y broblem arall fu gorddefnydd helaeth o hen raglenni sy’n cael eu hailadrodd dro ar ôl tro, sydd fwy na thebyg yn ateb rhad i’r gyllideb weithredol. Roedd hyn yn wael iawn dros y Nadolig.
Nos Sadwrn, fe gawson ni Noson Lawen, oedd yn gasgliad o raglenni blaenorol Noson Lawen.
Cefais fy arswydo fod yr union raglen Noson Lawen, oedd yn ailadrodd rhaglenni oedd yn cael eu hailadrodd, wedi dod ymhen deuddydd yn brif raglen y noson ar Ddydd Nadolig.
Dewch o ’na, S4C, rydych chi wir yn gwthio ffiniau goddefgarwch.
Mae’n rhaid bod gennych chi “lyfrgell” o raglenni gwell y gallech chi eu defnyddio.
Dw i’n copïo hyn i’m pum Aelod o’r Senedd a’m Haelod Seneddol, yn y gobaith y byddan nhw’n gwneud rhywbeth i sicrhau ein bod ni’n cael gwerth am ein trwydded deledu ac i ariannu S4C yn well.
Gobeithio y bydd eraill yn gwneud yr un fath, os nad yw’n ofer ysgrifennu at Aelod Seneddol neu Aelod o’r Senedd heddiw.
