Mae S4C wedi cyhoeddi mai Siân Doyle fydd yn olynu Owen Evans fel Prif Weithredwr y sianel.
Dros yr haf, cyhoeddodd Owen Evans ei fod am adael y sianel ar ôl pedair blynedd er mwyn dechrau ei rôl fel prif arolygydd Estyn yn y flwyddyn newydd.
Mae Siân Doyle yn gyn reolwr-gyfarwyddwr cwmni telegyfathrebu TalkTalk, a chyn hynny bu’n gweithio fel Cyfarwyddwr Manwerthu i EE, lle bu’n gyfrifol am arwain a datblygu tîm o 3,500 o gydweithwyr yn y Deyrnas Unedig.
Bu hefyd yn Uwch Is-Lywydd Cwmni Comcast Cable yn Philadelphia.
“Edrych ymlaen”
Dywedodd Siân Doyle ei bod hi’n “edrych ymlaen” at ddechrau gweithio gyda thîm S4C.
“Trwy fy ngyrfa rwyf wedi cael y fraint o weithio gyda phobl a chwmnïau arbennig a dwi wedi dysgu gymaint ag elwa o brofiadau gwerthfawr,” meddai Siân Doyle.
“Mae fy angerdd dros fy nghydweithwyr ac anghenion defnyddwyr wedi bod yn rhan annatod o fy mhrofiad dros y blynyddoedd.
“Nawr fy mod wedi dychwelyd i Gymru rwy’n edrych ’mlaen i weithio gyda’r tîm yn S4C ac arwain y sefydliad wrth iddo ymateb yn egnïol i’r newidiadau yn y tirwedd cyfryngau a sicrhau ei fod yn gwneud y gorau o bob cyfle’n chwim.
“Rwy’n ymuno gydag S4C ar drothwy’r esblygiad hwn ac mi fyddaf yn gweithio i ymbweru’r dalent sydd gyda ni yng Nghymru i arloesi ymhellach yn y byd digidol cyffrous hwn”.
“Angen mentro”
Dywedodd Rhodri Williams, Cadeirydd Bwrdd Unedol Cysgodol S4C, eu bod nhw’n “falch iawn i allu penodi arweinydd gyda chyfoeth o brofiad mewn llunio a gweithredu strategaethau uchelgeisiol a llwyddiannus ac o ddeall a bodloni anghenion defnyddwyr”.
“Mae angen mentro er mwyn sicrhau bod S4C yn atgyfnerthu ei hun fel darparwr cynnwys creadigol a beiddgar y mae defnyddwyr am ymwneud ag e’ ar draws amrywiaeth o lwyfannau,” meddai Rhodri Williams.
“Mae’r Bwrdd yn ymddiried yn gyfan gwbl yng ngallu Siân i fynd i’r afael â hyn ac i fanteisio ar y cyfleoedd y mae’r byd digidol yn creu.
“Bydd profiad helaeth Siân ym myd telegyfathrebu a manwerthu yn y Deyrnas Gyfunol, Canada a’r Unol Daleithiau yn ogystal, wrth gwrs, â’i chariad at y Gymraeg yn gaffaeliad mawr i S4C yn y blynyddoedd i ddod”.
Bydd Siân Doyle yn cychwyn fel Prif Weithredwr ar 1 Ionawr 2022.
Adroddiad blynyddol S4C yn un “cadarnhaol” yn ôl Cadeirydd y sianel
Prif Weithredwr S4C i adael y sianel
