Mae S4C wedi ymddiheuro am “gamgymeriad difrifol” yn ystod eitem oedd yn trafod Sage Todz.
Tynnodd Sage Todz sylw at y camgymeriad ar Prynhawn Da ar ei dudalen Twitter, gan ddweud bod “rhaid gwneud yn well na hyn”.
“Dw i ddim yn edrych fel @macethegreat_ ac ro’n i yn y stiwdio yr wythnos ddiwethaf,” meddai, ar ôl i lun o’r rapiwr Mace the Great o Gaerdydd gael ei ddefnyddio yn ystod eitem am y rapiwr o Benygroes.
@PrynhawnDaS4C we gotta do better than this, I don't look like @macethegreat_ and I was just in the studio last week 😂🤦🏾♂️ pic.twitter.com/bUyOVq1I5r
— Sage Todz (@SageTodz) June 20, 2023
“Ni’n nabod hwn, on’d y’n ni?” meddai’r gyflwynwraig Siân Thomas, cyn ychwanegu ei fod yn “llun gwych”.
Roedd nifer o berfformwyr eraill wedi ymateb i’r rhaglen, gan gynnwys Izzy Rabey, a ddywedodd “Mor sori”.
“Ymddiheurwch @PrynhawnDaS4C,” meddai Lleuwen. “Di hyn ddim yn ddigon da!”
‘Angen inni wneud yn well’
“Ymddiheuriadau @sagetodz am gamgymeriad difrifol ar raglen @PrynhawnDaS4C,” meddai’r sianel ar eu tudalen Twitter.
“Rydym yn cytuno nad yw hyn yn ddigon da ac yn cydnabod bod angen inni wneud yn well.
“Mae gennym y parch mwyaf tuag atat fel artist ac unigolyn.”
“Rydym yn hynod siomedig am gamgymeriad difrifol ar raglen Prynhawn Da ddoe lle y dangoswyd llun artist arall yn hytrach na’r canwr Sage Todz,” meddai’r sianel mewn datganiad pellach.
“Rydym wedi cysylltu gyda Sage i ymddiheuro yn fawr am y camgymeriad ac wedi trafod camau gyda’r cwmni cynhyrchu i sicrhau na fydd rhywbeth tebyg yn digwydd eto.
“Mae gan @S4Cy parch mwyaf at Sage fel un o dalentau mwyaf cyffrous Cymru ac rydym wrthi’n cydweithio ar nifer o brosiectau gydag ef.
“Rydym yn cydnabod nad yw hyn yn ddigon da a bod rhaid i ni wneud yn well.”
Galw am lacio rheol iaith yr Eisteddfod Genedlaethol i artistiaid gwadd
