Cafodd Sesiwn Fawr Dolgellau ei chynnal dros y penwythnos hwn, gyda miloedd yn dychwelyd i’r ŵyl werin boblogaidd yng nganol tref Dolgellau am y tro cyntaf ers dwy flynedd.
Cafodd pob tocyn penwythnos i’r ŵyl ei werthu yn gynt nag erioed eleni, ac roedd 58 o artistiaid yn perfformio ar draws naw llwyfan, gan ddod â chymysgedd eclectig o gerddoriaeth gwerin, roc a byd i’r dref.
Ymhlith artistiaid cerddorol prif lwyfan yr ŵyl yng Ngwesty’r Ship roedd Yws Gwynedd, Sŵnami, Tara Bandito, Skerryvore o’r Alban, N’famady Kouyaté o Guinea Gorllewin Affrica a The Trials of Cato.
Mae’r Sesiwn Fawr yn cael ei threfnu gan bwyllgor bychan o wirfoddolwyr lleol, gan gynnwys aelodau sydd wedi bod yno ers y dechrau un 30 mlynedd yn ôl, ynghyd â tho iau o drefnwyr.
‘Tydi’r Sgwâr ddim digon mawr’
Ymysg y sgyrsiau llenyddol roedd digwyddiad arbennig i lansio cyfrol y Sesiwn, Tydi’r Sgwâr ddim digon mawr, sy’n llawn hanesion, lluniau a hynt a helynt 30 mlynedd o’r Sesiwn Fawr.
“Roedd hi mor braf croesawu pawb yn ôl i’r Sesiwn wedi dwy flynedd o egwyl,” meddai Ywain Myfyr, awdur y gyfrol ac un o sylfaenwyr y Sesiwn Fawr.
“Pawb wedi cyrraedd hefo gwên lydan ar eu wynebau, ac mae’r wên wedi mynd yn fwy llydan fyth wrth i’r penwythnos fynd yn ei flaen ac wrth i bawb fwynhau’r arlwy amrywiol.
“Yn ogystal â bod yn hwb i’r ysbryd, mae’r penwythnos hefyd wedi bod yn hwb sylweddol i economi’r ardal yn dilyn cyfnod heriol o ganlyniad i’r pandemig.
“Dwi’n gobeithio y gallwn ni gyd edrych ymlaen yn hyderus at y 30 mlynedd nesa.”
‘Am benwythnos arbennig!’
“Am benwythnos arbennig!” meddai Llinos Rowlands, un o berchnogion siop gwin Dylanwad yn Nolgellau.
“Cafodd sawl ymwelydd sypreis neis o ddod wrth ddod ar draws yr ŵyl, a methu credu’r holl fwrlwm oedd i’w gael mewn tref mor fach.
“Am ddechrau da i’r haf i fusnesau’r dref.
“Diolch o galon i Bwyllgor y Sesiwn Fawr am eu gwaith caled unwaith eto.”
Bydd cyfle i fwynhau uchafbwyntiau’r Sesiwn Fawr mewn rhaglen arbennig 90 munud o hyd ar S4C, nos Sadwrn, Gorffennaf 23.
Am fwy o wybodaeth, ewch i www.sesiwfawr.cymru a chyfryngau cymdeithasol Sesiwn Fawr Dolgellau @sesiwnfawr / #SFD30.
O gigs i wyliau balchder: Geid golwg360 i’r hyn sydd ymlaen dros Gymru y penwythnos yma
Disgwyl “parti mawr” yn Nolgellau i ddathlu pen-blwydd y Sesiwn Fawr yn 30 oed
