Dyma bei efo gwahaniaeth. Pei Pob Dim. Ond nid pei â chrwst toes trwchus ydyw, ond pei wedi’i wneud gan ddefnyddio wrapiau. Mae’n fwyd llysieuol ac yn ysgafnach i’w fwyta ac yn gyflymach i’w baratoi na phei arferol. Mi fedrwch chi fod yn greadigol gyda’r cynhwysion a chynnwys eich hoff fwyd fel y dymunwch. Mae’n syniad gwych fel byrbryd neu ginio ysgafn. Yr hyn sy’n wych am bei fel hyn ydy bod modd defnyddio’r gwahanol weddillion sydd gennych yn yr oergell, yn hytrach na gwastraffu bwyd.
Beth fydda i ei angen?
Wraps
Tatws Maris Pipers
Caws Cambozola
Caws Brie
Tsili
Pupur coch, gwyrdd ac oren
Nionyn
Tomato
Garlleg
Pys melyn
Halen Svaneti
Shibwnsyn / sibolsyn
Mayonnaise
Mwstard
Paratoi a choginio
Torrwch y tatws maris pipers yn fan a’u rhoi yn y meicrodon am 12 munud
Torrwch yr holl gynhwysion eraill yn fan, ac eithrio’r caws, a’u ffrio am gwpwl o funudau
Gwasgarwch fenyn ar bowlen addas i’w rhoi yn y popty, a rhowch wrap o’i mewn gan wneud yn siŵr eich bod yn gorchuddio’r tu mewn yn gyfan
Torrwch y Cambozola yn haenau a’u gosod ar waelod y bowlen
Rhowch binsiad da o halen Svaneti neu halen o’ch dewis ar y llysiau a chymysgu’r tatws
Gwasgarwch y cymysgedd llysieuol yn y bowlen
Torrwch y Brie yn haenau, a’u gosod ar ben y llysiau
Cymysgwch lwy fwrdd da o mayonnaise gyda mwstard a’i wasgu ar ben y caws
Gorchuddiwch y pei gyda wrap cyn ei roi yn y popty ar wres uchel am ryw 5 munud
Dylai ymylon y pei fod wedi crimpio pan fydd yn barod
Torrwch, rhannwch a mwynhewch!
