Mae Medi Wilkinson wrth ei bodd yn creu prydau blasus sy’n dod â phobol at ei gilydd, ac yn dweud nad oes gwell ffordd o greu atgofion.
Ond mae hynny’n fwy anodd yng nghanol argyfwng costau byw. Felly sut mae mynd ati i baratoi a choginio pryd fforddiadwy i’r teulu oll?
Dyma Medi i gynnig syniad. Croeso i’w chegin!
“Gyda’r dyddiau’n byrhau, ydych chi ffansi rywbeth cynnes, blasus ond cyflym? Platiad sylweddol i’w rannu gyda ffrindiau a theulu gyda’r nos? Dyma’r ‘trît’ gaeafol perffaith efo gwydryn neu ddau o’ch hoff ddiod.”
Bara garlleg gyda menyn Cymreig, caws, rhosmari a chig moch
Beth fydda i ei angen?
- Torth cob
- Cig moch
- Caws mozzarella
- Menyn Cymreig
- Garlleg
- Rhosmari
Paratoi
Torrwch yr hyn a fynnoch o ddarnau bwlb garlleg yn fân
Torrwch sbrigynnau ffres o rosmari – ambell gentimedr yn unig
Torrwch hanner bloc (tua 125g) o fenyn Cymreig o’ch dewis, a’i roi mewn powlen
Llenwch bowlen cawl llawn caws Mozzarella
Ewch amdani!
Cyfarwyddiadau
1. Torrwch y dorth cob yn sgwariau bychain hyd at hanner ffordd, heb gyrraedd y gwaelod
2. Ffrïwch y Cig Moch mewn padell nes ei fod yn ‘crisbi’
3. Ychwanegwch y garlleg i’r badell gyda’r cig moch tan bod y garlleg yn frown, ond nid wedi ei losgi
4. Ychwanegwch y garlleg i’r bowlen llawn menyn a’i roi yn y popty ping i’w feddalu
5. Torrwch y cig moch yn ddarnau mân a’u gosod yn y tyllau o fewn y cob
6. Nawr, bydd angen tywallt y menyn Cymreig a’r garlleg ar draws y dorth cob (Peidiwch â phoeni am fod yn ‘daclus’!)
7. Lledaenwch y caws Mozzarella ar draws y dorth a’i gosod yn y popty am 10 munud
8. Ychwanegwch y sbrigynnau rhosmari rhwng y sgwariau bychain yn y dorth
9. Mwynhewch y wledd!
Cost
Cob = £1.29
Bacwn = £2.09
Mozarella £3.99 (bag 500g), ond defnyddio 250g = £2
Menyn £2.50 (250g), ond defnyddio 125g = £1.25
Garlleg £0.20
Rhosmari wedi ei dyfu
Cost y pryd cyfan = £6.83
Digon i deulu o 3 pherson = £2.27 y pen
