Mae ymgyrch i wahardd rasio milgwn wedi ennill cefnogaeth drawsbleidiol.
Mae’r elusen Hope Rescue Partners yn galw ar Aelodau o’r Senedd i gefnogi ei deiseb i wahardd y chwaraeon “creulon” yng Nghymru.
Bellach mae’r ddeiseb wedi denu dros 15,100 o lofnodion gan gynnwys y Cwnsler Cyffredinol Mick Antoniw, arweinydd y Democratiaid Rhyddfrydol, Jane Dodds, ac Aelod Seneddol Llafur dros Bontypridd, Alex Davies-Jones.
Gan fod y ddeiseb wedi denu dros 10,000 o lofnodion fe fydd y pwnc nawr yn cael ei drafod ar lawr y siambr maes o law.
Angen Deddfu
Mewn datganiad ar lawr y Senedd fe gyfeiriodd Jane Dodds at ei milgi 3 blwydd oed gan ddweud iddo ddioddef trawma yn dilyn ei gyfnod yn rasio, a bod angen cyflwyno deddfwriaeth i wahardd y chwaraeon yng Nghymru.
Mae’r chwaraeon eisoes wedi’i wahardd mewn 41 talaith yn yr UDA.
Mae yna o leiaf un ras milgi yn digwydd yng Nghymru bob wythnos ac ers 2018 mae’r elusen Hope Rescue Partners wedi achub dros 200 o gŵn.
Ond yn ôl stadiwm rasio milgwn Valley Grehounds, allan o 4,652 o rasys milgwn, dim ond 24 o filgwn ddioddefodd anaf difrifol – torri asgwrn gan amlaf.
Mae Mick Antoniw wedi mabwysiadu dau gi milgi i ddangos ei gefnogaeth i’r ymgyrch.
I support @HopeRescue's campaign to ban #greyhoundracing in Wales.
The injuries, deaths and high number of 'surplus' dogs created by the greyhound racing industry are unacceptable.
Not all hounds are as lucky as Eddie and Elsie here, who now have a loving home.#greyhoundfriend pic.twitter.com/epRKb4V65z— Mick Antoniw MS/AS ? (@MickAntoniw1) October 19, 2021
Fe ddywedodd ar ei gyfrif Twitter: “Rwy’n cefnogi ymgyrch Hope Rescue i wahardd rasio milgwn yng Nghymru. Mae’r anafiadau, y marwolaethau a’r nifer uchel o gŵn ‘dros ben’ a grëwyd gan y diwydiant rasio llwyd yn annerbyniol.
“Nid yw pob ci mor lwcus ag Eddie ac Elsie yma, sydd bellach â chartref cariadus.
“Bob blwyddyn, mae cannoedd o’r cŵn hyn yn dioddef anaf neu farwolaeth o ganlyniad i gael eu gorfodi i rasio, gyda llawer yn cael eu ‘rhoi i lawr’ oherwydd cost uchel o driniaeth feddygol, neu oherwydd diffyg cartrefi addas ar eu cyfer,” meddai Mick Antoniw, AoS Llafur dros Bontypridd.
“Nid yw’r anafiadau, y marwolaethau a’r nifer uchel o gŵn ‘dros ben’ a grëwyd gan y diwydiant rasio yn dderbyniol, ac mae’n gwneud gwaith sefydliadau fel Hope, sydd eisoes yn ymrwymo i gymryd yr holl gŵn amddifad o chwe awdurdod lleol yng Nghymru, hyd yn oed yn anos.”
“Maen nhw’n anifeiliaid hardd, dof a chariadus, ac yn haeddu gwell.”
