Dominique Strauss-Kahn
Mae pennaeth y Gronfa Ariannol Ryngwladol, Dominique Strauss-Kahn, wedi ei gadw dan glo yn yr Unol Daleithiau.
Penderfynodd barnwr yn Efrog Newydd na ddylai gael ei ryddhau ar fechnïaeth rhag ofn iddo ffoi i Ffrainc.
Roedd wedi ei arestio ar awyren oedd ar fin hedfan i Ffrainc ym Maes Awyr Kennedy,
Ymddangosodd Dominique Strauss-Kahn, 62 oed, yn y llys am y tro cyntaf ers cael ei arestio, ond ni ddywedodd air wrth i’w gyfreithiwr ddadlau ar ei ran.
Y cyhuddiad
Mae wedi ei gyhuddo o ymosod ar forwyn oedd wedi mynd i lanhau ei ystafell mewn gwesty moethus ger Times Square ddydd Sadwrn.
Dywedodd y forwyn 32 oed wrth yr awdurdodau ei bod hi wedi credu fod yr ystafell yn wag ond fod Dominique Strauss-Kahn wedi ymddangos o’r ystafell ymolchi yn noeth.
Roedd wedi rhedeg ar ei hôl hi i lawr y cyntedd, cyn ei llusgo hi’n ôl i’r ystafell ymolchi, meddai.
Honnodd ei fod wedi cydio yn ei bronnau, wedi ceisio tynnu ei dillad a’i gorfodi i gael rhyw geneuol, yn ôl y gwyn aeth o flaen y llys.
Ffoi
Llwyddodd y forwyn i ffoi a rhoi gwybod i weithwyr y gwesty beth oedd wedi digwydd, yn ôl yr awdurdodau. Cafodd ei thrin yn yr ysbyty am fan anafiadau.
“Mae’r dioddefwr eisoes wedi darparu adroddiad pwerus a manwl ynglŷn â’r ymosodiad rhywiol treisgar,” meddai dirprwy dwrnai’r cylch, John McConnell.
Dywedodd yr amddiffyn nad oedden nhw’n credu y byddai’r dystiolaeth fforensig yn awgrymu “fod y cyfarfod yn un treisiol”.
Yn sgil digwyddiadau’r penwythnos mae honiadau eraill am ymosodiadau gan bennaeth y Gronfa Ariannol Ryngwladol wedi dechrau denu sylw’r wasg.
Yn Ffrainc, dywedodd cyfreithiwr nofelydd ei bod hi’n debygol o gyhuddo Dominique Strauss-Kahn o ymosod arni’n rhywiol naw mlynedd yn ôl.
Mae arestiad pennaeth y Gronfa Ariannol Ryngwladol wedi ysgwyd y byd ariannol a gwleidyddiaeth Ffrainc.
Roedd yn ffefryn i olynu Nicolas Sarkozy yn arlywydd y wlad yn etholiad arlywyddol y wlad y flwyddyn nesaf.
