Cynnal pleidlais gudd yn erbyn Arlywydd De Affrica

Jacob Zuma, Arlywydd De Affrica
Mae disgwyl i bleidlais o ddiffyg hyder gael ei chynnal heddiw yn erbyn Arlywydd De Affrica, Jacob Zuma.

Er ei fod wedi goroesi sawl pleidlais debyg o’r blaen yn y Senedd, dyma fydd y tro cyntaf i’r bleidlais fod yn guddiedig.

Cyhoeddodd llefarydd Cynulliad Cenedlaethol De Affrica, Baleka Mbete, y byddai’r bleidlais gudd yn cael ei chynnal heddiw wrth siarad mewn cynhadledd newyddion yn Cape Town.

Dywedodd fod y penderfyniad i gynnal y bleidlais yn dilyn ymateb gan y cyhoedd.

Mae’r Arlywydd wedi wynebu galwadau i ymddiswyddo gan aelodau o’i blaid ei hun sef Cyngres Genedlaethol Affrica (ANC).

Mae honiadau ei fod yn gysylltiedig â sgandalau llygredd ac yn colli poblogrwydd ac fe allai’r bleidlais heddiw fod yn dyngedfennol wrth i aelodau fedru pleidleisio heb i’w harweinydd wybod.

Hyd yn hyn, mae Jacob Zuma wedi goroesi chwe phleidlais o ddiffyg hyder ers dod yn Arlywydd yn 2009.