Swyddog yr heddlu ym Mharis
Mae swyddogion yn Ffrainc yn trin ymosodiad ar orsaf yr heddlu ym Mharis fel digwyddiad “brawychol” posib.
Cafodd y dyn, oedd a chyllell yn ei feddiant, ei saethu’n farw gan yr heddlu.
Daw’r ymosodiad wrth i Ffrainc nodi blwyddyn union ers i eithafwyr Islamaidd ymosod ar swyddfeydd y cylchgrawn dychanol Charlie Hebdo gan ladd 12 o bobl, gan gynnwys plismon.
Dywedodd swyddog yr heddlu eu bod nhw’n trin y digwyddiad mwy fel “achos o frawychiaeth” na gweithred droseddol arferol.
Fe gadarnhaodd fod y dyn yn gwisgo gwregys ffrwydron “ffug”.
Mae ysgolion a strydoedd gerllaw wedi cael eu cau a phobl yn cael eu cynghori i aros yn eu cartrefi.
Y bore ma fe fu Arlywydd Ffrainc, Francois Hollande, yn annerch aelodau o luoedd diogelwch y wlad ynglyn a’r frwydr yn erbyn brawychiaeth.
