Mae Llywodraeth Prydain wedi cyhoeddi y bydd yn cyfrannu £29 miliwn ychwanegol o gymorth dyngarol i ogledd Ethiopia wrth i effaith rhyfela achosi trychineb cynyddol yno.
Mae’r Cenhedloedd Unedig yn amcangyfrif fod 5.5 miliwn o bobl yn wynebu prinder bwyd, gyda 400,000 yn dioddef newyn gwirioneddol o ganlyniad i’r ymladd yn rhanbarth Tigray dros y flwyddyn ddiwethaf.
Wrth i’r gwrthdaro ymestyn i ranbarthau eraill, bydd Prydain yn cynyddu cyfanswm ei hymrwymiad cymorth i £75 miliwn.
“Mae pobl Ethiopia yn wynebu trychineb, ac maen nhw mewn angen brys am gymorth,” meddai Gweinidog Affrica Llywodraeth Prydain, Vicky Ford.
“Bydd yr addewid hwn yn darparu bwyd, dwr a gofal iechyd i gannoedd o filoedd o bobl sy’n wynebu newyn yng ngogledd Ethiopia.
“Dw i’n pwyso ar bob ochr i gytuno ar gadoediad ar frys i ganiatáu i gymorth dyngarol gyrraedd pobl Tigray.”
Dechreuodd yr anghydfod yng ngogledd Ethiopia bron i flwyddyn yn ôl, pan drôdd tensiynau rhwng y prif weinidog Abiy Ahmed a gwleidyddion rhanbarthol yn wrthdaro milwrol.
Mae’n debygol fod miloedd wedi marw o ganlyniad i’r gwrthdaro ac mae’r Cenhedloedd Unedig a grwpiau hawliau dynol rhyngwladol wedi cyhuddo’r ddwy ochr o gyflawni troseddau rhyfel.
