Daeth cadarnhad fore heddiw (dydd Gwener, Awst 21) fod y Gweinidog Amaeth Dara Calleary wedi ymddiswyddo am ei ran yn y digwyddiad a gafodd ei gynnal er gwaethaf cyfyngiadau’r coronafeirws.
Bellach, mae’r Seneddwr Jerry Buttimer wedi gadael ei swydd yn Seanad Leas Cathaoirleach, neu Gadeirydd y Senedd ar ôl iddo yntau hefyd fod yn y digwyddiad.
Mae’n dweud iddo wneud hynny “ar adeg pan fo pobol o bob sector o’r gymdeithas Wyddelig wneud eu gorau i gadw pawb yn ddiogel yn ystod y pandemig byd-eang hwn”, ac mae e wedi ymddiheuro’n “ddi-ben-draw”.
Un arall sydd wedi ymddiheuro yw’r aelod seneddol Noel Grealish, ac yntau’n gapten ar y gymdeithas gynhaliodd y cinio, ond mae’n dweud iddo eistedd wrth fwrdd lle’r oedd chwech o bobol yn cadw pellter oddi wrth ei gilydd, ac mae’n dweud iddo gael sicrwydd bod y digwyddiad yn cadw at y rheolau.
Rhagor o ddatganiadau
Mae Aodhan o Riordain, aelod o’r Blaid Lafur, yn galw ar ragor o bobol oedd yn y cinio i egluro’u sefyllfa, ac mae e’n galw ar i’r Dáil ddod ynghyd yr wythnos nesaf.
“Mae angen i Gomisiynydd yr Undeb Ewropeaidd wneud datganiad heddiw,” meddai am Phil Hogan, un arall oedd yn y cinio.
“Dw i eisiau eglurhad ynghylch pam ei fod e’n teimlo’i bod yn briodol iddo fe fod yn y digwyddiad.
“A aeth e i gwarantîn am bythefnos pan ddaeth e’n ôl o Frwsel?”
