Nelson Mandela
Cyhoeddwyd heno fod cyn Arlywydd De Affrica, Nelson Mandela, wedi marw yn 95 oed.
Roedd Mandela wedi bod yn dioddef o salwch ar yr ysgyfaint ers peth amser ac wedi bod yn yr ysbyty am dri mis dros yr haf.
Cyhoeddwyd y newyddion mewn darllediad teledu gan Arlywydd presennol De Affrica, Jacob Zuma.
“Mae ein gwlad wedi colli ei mab mwyaf” meddai Mr Zuma.
Treuliodd Nelson Mandela 18 o flynyddoedd dan glo mewn carchar ar Ynys Robben am gymryd rhan mewn gweithgarwch yn erbyn apartheid, a naw mlynedd mewn carchar arall.
Daeth yn Arlywydd ei wlad yn 1994, oedd yn benllanw ar ei yrfa wleidyddol, y tro cyntaf i ddyn du dderbyn y swydd.
Ymateb Carwyn Jones
Mae Prif Weinidog Cymru, Carwyn Jones, wedi ymateb i’r newyddion trwy dalu teyrnged i Mandela.
“Gellid disgrifio Nelson Mandela fel un o ffigyrau mwyaf yr oes fodern.”
“Does dim llawer o bobol yn gallu hawlio eu bod wedi newid eu cenedl er gwell, trwy ddod â’r hyn oedd yn gymdeithas aruthrol o ranedig at ei gilydd.”
