Shobna Gulati (Boffy B GNU)
Mae pedwar o bobol yn dod ag achos llys yn erbyn papurau’r Mirror tros honiadau o hacio i negeseuon ffonau symudol.
Dyma’r tro cyntaf i gamau o’r fath gael eu cymryd yn erbyn papurau heblaw rhai News International.
Fe gyhoeddodd y cyfreithiwr cyfryngau, Mark Lewis, ei fod yn gweithredu ar ran y pedwar, sy’n cynnwys actores Coronation Street, Shobna Gulati.
Mae’r tri arall yn ymwneud â byd pêl-droed:
- Sven Goran-Eriksson, cyn reolwr tîm Lloegr.
- Abbie Gibson, a fu’n gofalu am blant David a Victoria Beckham.
- Garry Flitcroft, cyn gapten tîm Blackburn Rovers.
Fe gwympodd gwerth cyfrannau cwmni Trinity Mirror o 11% heddiw – yn ôl sylwebwyr, roedd hynny’n rhannol oherwydd y newyddion am y gweithredu cyfreithiol.
Does dim datganiad wedi dod eto gan Trinity Mirror eu hunain – nhw yw perchnogion y Daily Post a’r Western Mail a nifer o bapurau lleol yng Nghymru.
Mae’r honiadau’n ymwneud â phapurau Prydeinig y cwmni – y Daily Mirror, y Sunday Mirror a’r People.
