Brexit: Beirniadu UKIP am ddefnyddio cerddoriaeth ‘The Great Escape’

Mae UKIP wedi cael eu beirniadu am ddefnyddio’r gerddoriaeth allan o’r ffilm ‘The Great Escape’ ar fws yn ystod ymgyrch tros adael yr Undeb Ewropeaidd.

Mae Vote Leave ar daith o amgylch gwledydd Prydain ar drothwy’r refferendwm ar Fehefin 23.

Yn ôl papur newydd yr Observer, dywedodd meibion y cyfansoddwr Elmer Bernstein na fyddai eu tad wedi rhoi ei ganiatâd i’r gân gael ei defnyddio ar gyfer yr ymgyrch.

Mae Peter a Greg Bernstein wedi cyhuddo’r blaid o “gynhwynoliaeth a rhagfarn lled eglur”.

“Mae’n siwr y byddai’n dweud bod ‘The Great Escape’ yn dathlu’r rheiny a achubodd Ewrop o drefn ofnadwy o hiliol, cynhwynolaidd a threisgar”.

Ychwanegon nhw nad oedd eu tad yn caniatâu defnyddio ei gerddoriaeth at ddibenion gwleidyddol, a’i bod yn perthyn yn hytrach i “fyd adloniant lle’r oedd ei gwreiddiau”.

Sony ATV sy’n berchen ar hawliau’r gân erbyn hyn a dydy Vote Leave ddim wedi cadarnhau a oedd ganddyn nhw drwydded i gael ei defnyddio’n gyhoeddus.