Roedd penodi Cennad y Gwledydd a’r Rhanbarthau’n “sarhad” ar Gymru, yr Alban a Gogledd Iwerddon, yn ôl Liz Saville Roberts.
Daw sylwadau arweinydd Plaid Cymru yn San Steffan ar ôl iddi ddod i’r amlwg fod Sue Gray wedi gwrthod y swydd.
Cafodd swydd cynrychiolydd llywodraethau datganoliedig y Deyrnas Unedig ar ran Llywodraeth y Deyrnas Unedig ei chynnig i Sue Gray fis diwethaf (Hydref 6), yn sgil diswyddo’r gweinidog sifil o’i rôl yn Bennaeth Staff Syr Keir Starmer, Prif Weinidog y Deyrnas Unedig, yn dilyn sïon am anghydfod rhyngddi hi a Morgan McSweeney, rheolwr ymgyrchu’r Blaid Lafur.
Bryd hynny, dywedodd Sue Gray ei bod hi wedi derbyn y swydd.
Fodd bynnag, doedd hi ddim yn bresennol yng nghyfarfod cyntaf Cyngor y Gwledydd a’r Rhanbarthau ar Hydref 11, fel roedd nifer yn disgwyl iddi fod.
Heddiw, mae’n ymddangos bod Sue Gray wedi gwrthod y swydd ar ôl oedi am chwe wythnos cyn gwneud penderfyniad.
Mae ffynonellau sy’n agos at y gweinidog sifil yn dweud ei bod hi’n pryderu na fyddai digon o rym na mynediad ganddi at y Prif Weinidog er mwyn medru cyflawni dyletswyddau’r rôl.
‘Swydd ffug’
Dywed Liz Saville-Roberts fod y newyddion wedi cadarnhau ei hamheuon blaenorol mai modd o daflu Sue Gray i’r neilltu oedd ei phenodi’n gennad ar y gwledydd a’r rhanbarthau.
“Roedd ‘cennad y gwledydd a’r rhanbarthau’ wastad yn swydd ffug wedi’i chreu gan Keir Starmer fel dyfais i ddatrys problemau mewnol y Blaid Lafur,” meddai ar X (Twitter gynt).
“Mae’r holl bennod hon wedi bod yn sarhad ar Gymru, yr Alban, a Gogledd Iwerddon.”
