“Gwyrth” fod gyrrwr tacsi wedi goroesi ymosodiad Lerpwl

Mae’r gyrrwr tacsi oedd wedi goroesi’r ymosodiad brawychol ar ei gerbyd y tu allan i ysbyty menywod yn Lerpwl yn dweud ei bod yn “wyrth” ei fod e wedi goroesi’r digwyddiad.

Ar Sul y Cofio yr wythnos ddiwethaf (Tachwedd 14), cafodd Emad Al Swealmeen, 32, ei ladd ar ôl ffrwydro’r cerbyd oedd yn cael ei yrru gan David Perry.

Llwyddodd y gyrrwr i ddianc cyn i’r cerbyd fynd ar dân ar ôl i ddyfais cartref ffrwydro.

Ac mae Perry a’i wraig Rachel wedi cyhoeddi datganiad drwy law’r heddlu yn diolch i’r cyhoedd am eu “haelioni anhygoel” ers y digwyddiad.

Maen nhw wedi diolch i staff yr ysbyty menywod a staff Ysbyty Aintree, Heddlu Glannau Merswy a’r Heddlu Gwrth-derfysgaeth.

“Dw i’n teimlo ei bod yn wyrth fy mod i’n fyw, a dw i mor ddiolchgar na chafodd neb arall eu hanafu yn y fath weithred fileinig,” meddai David Perry.

“Mae angen amser arna i nawr i geisio dod i delerau â’r hyn sydd wedi digwydd, ac i ganolbwyntio ar fy adferiad yn feddyliol ac yn gorfforol.

“Byddwch yn garedig, yn wyliadwrus a chadwch yn ddiogel, os gwelwch yn dda.”

Llythyr

Mewn llythyr sydd wedi’i gyhoeddi heddiw (dydd Sul, Tachwedd 21), mae Serena Kennedy, Prif Gwnstabl Heddlu Glannau Merswy, y Maer Joanne Anderson, y Comisiynydd Heddlu Emily Spurrell a’r Maer Dinesig Steve Rotherham, wedi talu teyrnged i’r gwasanaethau brys a’u hymateb i’r digwyddiad.

“Nod brawychiaeth yn y pen draw yw creu anghytgord, diffyg ymddiriedaeth ac ofn yn ein cymunedau, a thra ein bod ni’n gwybod y bydd rhai pobol yn bryderus ac yn ofidus, rydym wedi gweld pobol ledled Lerpwl yn sefyll ochr yn ochr,” meddai’r llythyr.

“Ac mae hynny am fod Lerpwl, sydd â threftadaeth falch fel dinas amlddiwylliannol, a rhanbarth ehangach Glannau Merswy, bob amser yn cyd-dynnu ar adegau fel hyn ac mae balchder ein holl gymunedau’n glir i’w weld.”