Bu’n rhaid i Michael Gove, Gweinidog Swyddfa’r Cabinet, adael yr uwchgynhadledd gyda Phrif Weinidog Cymru, Mark Drakeford, ac arweinwyr gwledydd eraill y Deyrnas Unedig ddoe (dydd Iau 3 Mehefin), a hynny ar ôl iddo gael ei hysbysu y gallai fod wedi dod i gysylltiad â rhywun oedd â’r coronafeirws ar daith i Bortiwgal.

Roedd Michael Gove wedi mynd i Porto gyda’i fab i wylio rownd derfynol Cynghrair y Pencampwyr rhwng Chelsea a Manchester City.

Cafodd wybod drwy ap y Gwasanaeth Iechyd Gwladol y gallai fod wedi bod mewn cysylltiad â rhywun oedd â’r feirws.

Adroddodd y Daily Mail bod y cysylltiad yn debygol o fod wedi digwydd ar yr awyren adref o Porto.

Cadarnhaodd Swyddfa’r Cabinet fod Michael Gove wedi cael ei hysbysu gan yr ap.

Roedd Michael Gove i fod yn y cyfarfod â Phrif Weinidogion Cymru, yr Alban a Gogledd Iwerddon, ynghyd â Boris Johnson, i drafod adferiad o’r coronafeirws.

Yn dilyn y cyfarfod, rhybuddiodd Prif Weinidog Cymru, Mark Drakeford, y gallai Boris Johnson achosi i’r Deyrnas Unedig chwalu os yw’n penderfynu “dwyn pwerau a dwyn arian” gan Lywodraeth Cymru yn dilyn yr uwchgynhadledd.

Yn hytrach na hunanynysu am 10 diwrnod, bydd Michael Gove yn gallu cymryd rhan mewn cynllun peilot ar gyfer gweithleoedd, gan gynnwys Rhif 10, lle bydd yn cael ei brofi bob dydd am wythnos yn lle.

Prydain

Gallai Boris Johnson chwalu’r Deyrnas Unedig os yw’n “dwyn pwerau a dwyn arian” gan Lywodraeth Cymru, medd Mark Drakeford

“Mae hynny’n wrthgynhyrchiol iawn, iawn ac yn cael effaith gwbl groes” medd Prif Weinidog Cymru yn dilyn uwchgynhadledd rhwng arweinwyr y pedair gwlad