Roedd y trais tuag at yr heddlu yn ystod protest arall ym Mryste neithiwr yn “warthus”, yn ôl Prif Weinidog y Deyrnas Unedig.
Fe wnaeth Boris Johnson y sylwadau wrth i swyddogion ddweud eu bod yn pryderu y gallai mwy o anhrefn ddilyn.
Dywedodd Mr Johnson bod yr heddlu a’r ddinas wedi cael ei gefnogaeth lawn yn dilyn gwrthdaro pellach yn nhrydydd gwrthdystiad Kill the Bill ym Mryste.
Trydarodd: “Neithiwr gwelwyd ymosodiadau gwarthus yn erbyn swyddogion yr heddlu ym Mryste.
“Ni ddylai ein swyddogion orfod wynebu cael briciau, poteli a thân gwyllt yn cael eu taflu atynt gan griw sy’n benderfynol o drais ac achosi difrod i eiddo. Mae’r heddlu a’r ddinas yn cael fy nghefnogaeth lawn.”
Fe wnaeth yr Ysgrifennydd Cartref Priti Patel drydar hefyd ei bod hi’n amlwg mai’r bwriad oedd achosi helynt
Gorymdaith
Ychwanegodd: “Mae’r trafferthion ym Mryste a’r trais sy’n cael ei gyfeirio tuag at yr heddlu yn fy ffieiddio.
“Does gen i ddim amheuaeth y bydd y mwyafrif tawel, sy’n cadw at y gyfraith, yn cael ei brawychu gan weithredoedd y lleiafrif troseddol hwn.
“Er gwaethaf rhybuddion mynych i wasgaru, mae’n amlwg mai dim ond bwriad i achosi helynt oedd gan y drwgweithredwyr yma.”
Daw ei sylwadau ar ôl i 10 gael eu harestio ar ôl yr hyn a ddisgrifiodd yr heddlu yn “ymddygiad treisgar” annerbyniol yn y brotest.
Ymunodd tua 300 o bobl mewn gorymdaith brotest drwy ganol y ddinas yn erbyn Mesur Heddlu, Troseddu, Dedfrydu a Llysoedd newydd y Llywodraeth nos Wener, cyn i’r dorf chwyddo i ragor na 1,000 wrth i’r tensiwn gynnyddu.
Last night saw disgraceful attacks against police officers in Bristol.
Our officers should not have to face having bricks, bottles and fireworks being thrown at them by a mob intent on violence and causing damage to property.
The police and the city have my full support.
— Boris Johnson (@BorisJohnson) March 27, 2021
Rhagor o brotestiadau
Fe wnaeth swyddogion yr heddlu oedd yn gwisgo helmedau ac defnyddio tariannau wasgaru’r protestwyr ar ôl 10yh oherwydd cyfyngiadau Covid.
Dywedodd Heddlu Avon a Gwlad yr Haf fod poteli gwydr, briciau, paent, wyau a thân gwyllt wedi cael eu taflu at swyddogion.
Roedd protestwyr hefyd wedi saethu goleuadau laser i wynebau swyddogion, meddai’r llu.
Dywedodd yr Uwch-arolygydd Mark Runacres heddiw bod yr heddlu’n paratoi ar gyfer rhagotr o brotestiadau dros y dyddiau nesaf.
Dywedodd y bydd newidiadau mewn deddfwriaeth ddydd Llun yn caniatáu i’r heddlu ymgysylltu’n fwy effeithiol â threfnwyr protest.
Cyn yr arestiadau, roedd protestwyr yn dawnsio i gerddoriaeth er gwaethaf glaw trwm, yn dosbarthu blodau ac yn arddangos sloganau fel “Pwy ydych chi’n ei ddiogelu?” a “Chyfiawnder i Sarah”, gan gyfeirio at farwolaeth Sarah Everard.
Mae’r swyddog heddlu Wayne Couzens, 48, o Deal, Swydd Cent, wedi ei gyhuddo o’i llofruddiaeth.
Byddai Mesur arfaethedig yr Heddlu, Troseddu, Dedfrydu a Llysoedd yn rhoi mwy o bŵer i’r heddlu yng Nghymru a Lloegr osod amodau ar brotestiadau di-drais, gan gynnwys y rhai a ystyrir yn rhy swnllyd neu niwsans, gyda’r rhai a gollfarnwyd yn agored i ddirwyon neu garchar.
