Bydd yr Arglwydd Frost a Michel Barnier, prif drafodwyr y naill ochr a’r llall, yn cyfarfod heddiw (dydd Sul, Rhagfyr 6) i geisio unwaith eto i daro bargen.
Ond prin yw’r amser sydd ar ôl erbyn hyn.
Daw’r cyfarfod diweddaraf ar ôl i Boris Johnson ac Ursula von der Leyen, Llywydd Comisiwn Ewrop, gynnal trafodaethau dros y ffôn ddoe (dydd Sadwrn, Rhagfyr 5).
Mae un ffynhonnell o Lywodraeth Prydain yn dweud mai “tafliad ola’r dis” fydd y trafodaethau heddiw, gan rybuddio bod rhaid i’r Undeb Ewropeidd “fod yn barod i barchu egwyddorion sylfaenol sofraniaeth a rheolaeth”.
‘Gwahaniaethau sylfaenol’
Yn dilyn eu cyfarfod, dywedodd Boris Johnson ac Ursula von der Leyen mewn datganiad ar y cyd fod yna “wahaniaethau sylfaenol” rhyngddyn nhw o hyd.
Mae’r rhain yn cynnwys pysgodfeydd, rheolau cystadleuaeth a’r trefniadau llywodraethiant ar gyfer unrhyw fargen.
“Fe wnaeth y ddwy ochr danlinellu na fydd unrhyw gytundeb yn bosib os na fydd y materion hyn yn cael eu datrys,” meddai’r ddau yn eu datganiad.
Yr Arglwydd Frost a Michel Barnier
Cyhoeddodd yr Arglwydd Frost a Michel Barnier ddydd Gwener (Rhagfyr 4) eu bod nhw am oedi’r trafodaethau yn dilyn yr anghytundeb diweddaraf.
Bydd yr Arglwydd Frost yn dychwelyd i Frwsel gyda’i dîm bach i geisio datrys y materion sydd yn weddill.
Mae lle i gredu nad yw Llywodraeth Prydain yn fodlon bod yr Undeb Ewropeaidd wedi cyflwyno “gofynion di-gynsail a munud olaf” a fyddai wedi ymrwymo Prydain i reolau Ewropeaidd “am dragwyddoldeb”.
Roedden nhw’n cyhuddo’r Undeb Ewropeaidd o geisio datrysiad “afrealistig”.
Beth nesaf?
Yfory (dydd Llun, Rhagfyr 7), bydd aelodau seneddol yn pleidleisio er mwyn penderfynu a fyddan nhw’n gwyrdroi gwelliannau’r Arglwyddi sy’n tynnu gofynion Bil y Farchnad Fewnol allan o ddeddfwriaeth er mwyn gwarchod ffiniau Iwerddon.
Byddan nhw wedyn yn ystyried y Bil Trethi ddiwedd yr wythnos am resymau tebyg.
Mae’r ddeddfwriaeth eisoes wedi cythruddo’r Undeb Ewropeaidd wrth i Lywodraeth Prydain geisio cyflwyno mesurau a fyddai’n eu galluogi i anwybyddu amodau’r fargen.
