Mae disgwyl iddi ddweud bryd hynny fod “Prydain ar agor ar gyfer busnes” ac yn barod i groesawu’r “doniau byd-eang mwyaf disglair”.
Bydd y drefn newydd yn dod i rym ar Ionawr 1.
Bwriad y cynllun yw cwtogi nifer y gweithwyr â sgiliau lefel isel fydd yn cael dod i wledydd Prydain, ond fe ddylai fod yn haws i weithwyr â sgiliau lefel uchel gael fisa.
Bydd angen i bobol sydd am weithio yng ngwledydd Prydain sgorio o leiaf 70 o bwyntiau er mwyn bod yn gymwys ar gyfer fisa.
Bydd y gallu i siarad Saesneg, cael cynnig swydd gan gyflogwr cymwys ac ennill isafswm cyflog penodol yn rhan o’r gofynion.
Bydd fisa iechyd a gofal ar gael i weithwyr iechyd, tra bydd llwybr ar gael i raddedigion o dramor gael aros yng ngwledydd Prydain i weithio am ddwy flynedd ar ôl graddio.
‘Adennill rheolaeth ar ffiniau’
“Fe wnaeth pobol Prydain bleidleisio dros adennill rheolaeth ar ein ffiniau a chyflwyno system fewnfudo’n seiliedig ar bwyntiau,” meddai Priti Patel.
“Nawr ein bod ni wedi gadael yr Undeb Ewropeaidd, mae gennym rwydd hyn i ddad-gloi potensial llawn y wlad hon a chyflwyno’r newidiadau sydd eu hangen arnom i adfer ymddiriedaeth yn y system fewnfudo a chyflwyno system decach, fwy cadarn yn seiliedig ar sgiliau o Ionawr 1, 2021.
“Mae Prydain ar agor ar gyfer busnes ac yn barod i groesawu’r doniau byd-eang gorau a mwyaf disglair.”
Craffu yn sgil ‘pryderon gwrioneddol’
Dywed Nick Thomas-Symonds, Aelod Seneddol Llafur Torfan a llefarydd materion cartref y blaid yn San Steffan, fod y blaid yn barod i graffu’n ofalus ar y cynlluniau fisa.
“Byddwn ni’n craffu’n ofalus iawn y cynlluniau ar fisas,” meddai.
“Mae’r Llywodraeth wedi rhuthro wrth gyflwyno deddfwriaeth fewnfudo heb fawr o fanylion yng nghanol pandemig byd-eang.
“Mae yna bryderon gwirioneddol y bydd hyn yn achosi problemau mawr i’n Gwasanaeth Iechyd a’n sector gofal, ar adeg pan ydyn ni’n aros i’r Llywodraeth wireddu eu haddewid o ddileu’r gor-dâl iechyd annheg i fewnfudwyr oedd yn wynebu tâl i gael mynediad i’r union wasanaethau roedden nhw’n eu cynnal er mwyn helpu eraill yn ystod y cyfnod mwyaf anodd.”
