Plant a phobl ifanc ‘mewn perygl o’u radicaleiddio’

Mae ffigyrau newydd yn dangos bod un plentyn neu berson ifanc yn cael eu cyfeirio at raglen wrth-radicaleiddio’r Llywodraeth bob dydd.

Rhwng Ebrill 2012 a Mehefin 2014 roedd  834 o dan 18 oed wedi cael eu cyfeirio at “Channel”, sy’n darparu cymorth i bobl sydd wedi eu nodi o fod mewn perygl o gael eu dylanwadu gan frawychwyr.

Yn 2012/13 roedd cyfanswm o 290 o bobl ifanc a phlant wedi cael eu cyfeirio at y rhaglen, gyda’r nifer yn cynyddu bron i 50% i 423 y flwyddyn ganlynol.

Roedd y data gan Gyngor Cenedlaethol Penaethiaid yr Heddlu (NPCC) yn dangos bod 84 o blant o dan 12 oed wedi eu cyfeirio at y rhaglen.

Dywedodd y Swyddfa Gartref, ers i’r rhaglen cael ei chyflwyno’n genedlaethol mae yna fwy na 4,000 o bobl wedi derbyn cymorth.

Gall pobl gael eu cyfeirio at y rhaglen gan amrywiaeth o sefydliadau megis ysgolion, gwasanaethau cymdeithasol a chyrff iechyd.

Daw’r ffigyrau i’r amlwg yn dilyn cais Rhyddid Gwybodaeth gan y Press Association.

Dywedodd y Gweinidog Diogelwch John Hayes: “Ers i Channel gael ei gyflwyno’n genedlaethol mae cannoedd o bobl sydd mewn perygl o gael eu dylanwadu gan frawychiaeth dreisgar wedi derbyn cefnogaeth.

“Mae cyfeiriadau at Channel wedi cynyddu ers 2014, ac rydym wedi neilltuo adnoddau digonol i’r rhaglen i ymdopi â’r galw.”