Dyn, 43, mewn cyflwr difrifol ar ôl digwyddiad ger Abercynon

Mae dyn mewn cyflwr difrifol yn yr ysbyty ar ôl cael ei saethu ger Abercynon neithiwr.

Yn ôl llygad dystion cafodd dau ergyd o wn eu clywed yn cael eu tanio o gar Audi A3 gwyn tua 7.40yh neithiwr.

Cafodd Mark Jones, 43 oed, o Aberpennar ei gludo i Ysbyty Tywysog Siarl ym Merthyr Tudful lle mae mewn cyflwr difrifol.

Mae dyn 46 oed o Aberpennar wedi cael ei arestio ar amheuaeth o geisio llofruddio, meddai Heddlu’r De ac yn cael ei gadw yn y ddalfa.

Mae Heddlu’r De yn parhau i ymchwilio i’r digwyddiad ar yr A4059 rhwng Aberpennar ac Abercynon ac yn apelio am wybodaeth gan unrhyw un a oedd wedi clywed gan Mark Jones, neu wedi ei weld yn ystod y nos neithiwr.

Mae’r heddlu hefyd yn awyddus i glywed gan unrhyw un a welodd beth ddigwyddodd, neu’r car neu unrhyw un a oedd yn yr ardal  rhwng 7.30yh a 8yh.

Dywed yr heddlu bod y digwyddiad wedi achosi pryder i drigolion lleol ond nad ydyn nhw’n credu bod yna risg i’r cyhoedd.

Dylai unrhyw un sydd â gwybodaeth ffonio Heddlu’r De ar 02920 527303 neu 101 gan nodi’r rhif cyfeirnod 1500271720, neu Taclo’r Taclau yn ddienw ar 0800 555111.