Mae Alex Salmond yn credu y caiff ail gyfle i gynnal refferendwm ar annibyniaeth i’r Alban – a’r tro nesa’, mae’n credu y gall ennill.
Mae’n gwneud ei sylwadau ym mhapur newydd The Times, ac mae’n dipyn o newid meddwl ers iddo gyfadde’ – yn dilyn pleidlais ‘Na’ mis Medi eleni – mai “cyfle unwaith mewn cenhedlaeth” oedd Alban rydd.
Erbyn hyn, meddai, mae’n credu y bydd yn byw i weld yr Alban yn mynd yn annibynnol.
“Fe ddywedodd gyrrwr tacsi wrtha’ i ei fod e wedi pleidleisio ‘Na’ i annibyniaeth, ond y byddai’n gwneud pethau’n wahanol y tro nesa’,” meddai Alex Salmond.
“Dw i’n credu y basan ni’n ennill pe bai yna refferendwm arall. Dyna sut mae bywyd… weithiau mae pobol yn cael ail gyfle.”
